సాహోలో శ్ర‌ద్ధా లుక్ ఇదే!!

ప్ర‌భాస్ హీరోగా భారీ బ‌డ్జెట్‌తో తెర‌కెక్కుతున్న సినిమా సాహో. ఆ సినిమా ద్వారా తెలుగు తెర‌కు ప‌రిచ‌యం అవుతోంది బాలీవుడ్ బ్యూటీ శ్ర‌ద్ధా కపూర్‌. ఆ సినిమాలో శ్ర‌ద్ధా లుక్ ఎలా ఉంటుందో... ఇంత‌వ‌ర‌కు తెలియ‌దు. ఇదిగో ఇప్పుడు ఆ లుక్ లీక్ అయ్యింది. సోష‌ల్ మీడియాలో వైర‌ల్ అవుతోంది.

సాహో టీమ్ మొత్తం ప్ర‌స్తుతం విదేశాల్లో బిజీగా ఉంది. ముప్పై కోట్ల రూపాయ‌లు ఖ‌ర్చుపెట్టి... ఓ భారీ యాక్ష‌న్ సీన్‌ను తెరకెక్కిస్తున్నారు. ఫైట్ సీన్ కోసం ఇంత పెద్ద మొత్తంలో ఖ‌ర్చుపెట్ట‌డం చాలా అరుదు. హాలీవుడ్ స్టంట్ కొరియోగ్రాఫ‌ర్ కెన్నీ గేట్స్ ఆ ఎపిసోడ్ కు ప‌నిచేస్తున్నారు. సుజీత్ ద‌ర్శ‌కుడిగా ప‌నిచేస్తున్న ఈ సినిమాలో టాలీవుడ్‌తో పాటూ బాలీవుడ్ ముఖాలు కూడా చాలా ఉన్నాయి. హీరోయిన్ శ్ర‌ద్ధానే కాదు... జాకీ ష్రాఫ్‌... చుంకీ పాండే... నీట్ నితిన్ ముఖేష్‌... వంటి తార‌లు ఉన్నారు. ఎందుకంటే ఈ సినిమా తెలుగుతో పాటూ బాలీవుడ్‌లో కూడా విడుద‌ల చేయాల‌న్న‌ది ప్లాన్‌. అందుకోస‌మే అంత‌మంది బాలీవుడ్ న‌టును ఎంపిక చేశారు. ఇందులో శ్ర‌ద్ధా లుక్ ఎలా ఉంటుందో ఇంత‌వ‌ర‌కు తెలియ‌దు. ఇప్పుడు ఆమె లుక్ బ‌య‌టికి రావ‌డంతో నెటిజ‌న్లు షేర్లు... లైకులు భారీగా కొడుతున్నారు.

శ్ర‌ద్ధా చాలా సింపుల్ కనిపిస్తోంది. ష‌ర్ట్‌... ట్రౌజ‌ర్‌ లో... న‌డుము మీది చేతుల‌తో... కాస్త సీరియ‌స్‌గా చూస్తున్న‌ట్టు ఉంది. ఈ సినిమా ద్వారా ప్ర‌భాస్ బాలీవుడ్ ఎంట్రీ ఇవ్వ‌బోతున్నాడు. ప్ర‌భాస్‌తో ప‌నిచేస్తున్న నీల్ నితిన్ ముఖేష్ వంటి బాలీవుడ్ తార‌లు బాహుబ‌లిని తెగ పొగిడేస్తున్నారు. అత‌ను చాలా విన‌య‌వంతుడ‌ని... ప్ర‌తి ఒక్క‌రితో చాలా సౌమ్యంగా మాట్లాడుతాడ‌ని అన్నారు. జీవితంలో అయిదేళ్ల కాలాన్ని ఒకే సినిమాకు కేటాయించ‌డానికి చాలా ధైర్యం కావాల‌ని... త‌న క‌ష్టాన్ని న‌మ్ముకున్న ప్ర‌భాస్ ఆ ప‌ని చేశాడ‌ని అన్నారు.