చాప్టర్ 2 కు శాంపిల్ ఇదేనన్న శ్రద్ధా కపూర్

తెలుగు ఆడియన్స్ మాత్రమే కాకుండా దేశవ్యాప్తంగా సినీ ప్రేమికులు ఎంతో ఆసక్తితో ఎదురుచూస్తున్న సినిమా 'సాహో'. ఈ సినిమాకు సంబంధించిన 'షేడ్స్ ఆఫ్ సాహో చాప్టర్ 1' గత ఏడాది అక్టోబర్ 22 న విడుదలై సోషల్ మీడియాలో సంచలనం సృష్టించింది. సినిమా రిలీజ్ లేట్ అవుతోందని ..అప్డేట్స్ రావడం లేదని కోపంగా ఉన్న అభిమానులను ఎంతో సంతోషపరిచింది ఆ మేకింగ్ వీడియో.

ఇప్పుడు షేడ్స్ ఆఫ్ సాహో చాప్టర్ 2 కు రంగం సిద్ధం అవుతోంది. మార్చ్ 3 వ తారీఖున ఈ వీడియో ను రిలీజ్ చేస్తున్నారు. సాహో' హీరోయిన్ శ్రద్ధా కపూర్ తన ట్విట్టర్ ఖాతా ద్వారా "మనమందరం ఎంతో ఆసక్తిగా ఎదురు చూస్తున్న సమయం రానే వచ్చింది. షేడ్స్ ఆఫ్ సాహో చాప్టర్ 2 ను నా పుట్టిన రోజు సందర్భంగా మార్చ్ 3 న రిలీజ్ చేస్తున్నాం" అని ట్వీట్ చేస్తూ చాప్టర్ 2 కు శాంపిల్ అన్నట్టుగా ఒక 16 సెకండ్ల వీడియో క్లిప్ ను తన ట్విట్టర్ ఖాతా ద్వారా పోస్ట్ చేసింది.

చాప్టర్ 1 లాగానే ఈ చాప్టర్ 2 శాంపిల్ క్లిప్ కూడా అదిరిపోయింది. దుబాయ్ షెడ్యూల్ లో షూట్ చేసిన యాక్షన్ ఎపిసోడ్ కు సంబంధించిన కొన్ని కీలకమైన షాట్స్ ఇందులో ఉన్నాయి. శ్రద్ధా కూడా ఫుల్ యాక్షన్ మోడ్ లో కనిపించింది. ఇక 'డార్లింగ్' కూడా తనదైన స్టైల్లో స్పోర్ట్స్ బైక్ పై రయ్యిమని దూసుకుపోతున్నాడు. శాంపిల్ చూస్తుంటే చాప్టర్ 2 కూడా ప్రేక్షకులను మెప్పించడం ఖాయమేననిపిస్తోంది.