తెలుగు తెరకు మరో టాలెంట్ దొరికిందే

టాలీవుడ్ కు కొత్త హీరోయిన్లు ఎంతమంది వస్తున్నా అదేంటో ఎప్పుడూ హీరోయిన్ల కొరత భారీగానే ఉంటుంది. ఈమధ్య రెండేళ్ళలో రష్మిక మందన్న.. షాలిని పాండే.. పాయల్ రాజ్ పుత్.. కియారా అద్వాని.. నభా నటేష్.. ప్రియాంక జవాల్కర్.. ఇలా చెప్పుకుంటూ పోతే దాదాపు డజన్ కు పైగా హీరోయిన్లు ఎంట్రీ ఇచ్చారు. ఇప్పుడు తాజాగా వారి లిస్టులోకి శ్రద్ధ శ్రీనాథ్ కూడా చేరింది.

బెంగుళూరు భామ అయిన శ్రద్ధ శ్రీనాథ్ కన్నడలో 'U టర్న్' సినిమాతో భారీగా గుర్తింపు తెచ్చుకుంది. గ్లామర్ మాత్రమే కాకుండా నటన కూడా పుష్కలంగా ఉన్న హీరోయిన్ కావడంతో తెలుగు నిర్మాతల దృష్టిలో కూడా పడింది. న్యాచురల్ స్టార్ నాని తాజా చిత్రంలో హీరోయిన్ గా నటించిన ఈ భామ తన మొదటి తెలుగు సినిమాతోనే ప్రేక్షకులను మెప్పించింది. 'జెర్సీ' కి మొదటి షో నుంచే హిట్ టాక్ రావడంతో ఈ అమ్మడు ఇప్పుడు టాలీవుడ్ లో ఒక హాట్ టాపిక్ అయింది. నాని నటన గురించి అందరికీ తెలిసిందే కాబట్టి బ్రిలియంట్ గా యాక్ట్ చేయడంలో సర్ ప్రైజ్ ఏమీ లేదు. కానీ ఈ సినిమా తో ఇద్దరికి బ్రేక్ వచ్చింది.. వారిలో మొదటి వ్యక్తి దర్శకుడు గౌతమ్ తిన్ననూరి కాగా రెండో వ్యక్తి శ్రద్ధా శ్రీనాథ్.

శ్రద్ధా చేతిలో ప్రస్తుతం అరడజను సినిమాలున్నాయి. అందులో కన్నడ.. తమిళ సినిమాలే ఎక్కువ. తెలుగులో మాత్రం ఆది సాయి కుమార్ సినిమా 'జోడి' లో హీరోయిన్ గా నటిస్తోంది. ఇప్పుడు 'జెర్సీ' హిట్ అయింది కాబట్టి టాలీవుడ్ లో తన కెరీర్ ఎలా సాగుతుందో వేచి చూడాలి. ఏదేమైనా తెలుగుతెరకు మరో మంచి నటి.. పరాయి భాషకు చెందిన కిరాక్ భామ దొరికినట్టే.