జెర్సీ భామకు రాజుగారి బ్యానర్లో చాన్స్?

శుక్రవారం రిలీజ్ అయిన నాని తాజా చిత్రం 'జెర్సీ' సూపర్ హిట్ టాక్ తో దూసుకుపోతోంది. ఈ సినిమాతో శ్రద్ధా శ్రీనాథ్ హీరోయిన్ గా టాలీవుడ్ ఎంట్రీ ఇచ్చిన సంగతి తెలిసిందే. 'జెర్సీ' సినిమాలో నాని.. శ్రద్ధా శ్రీనాథ్ ల పెర్ఫార్మన్స్.. గౌతమ్ తిన్ననూరి డైరెక్షన్ ఇప్పుడు టాలీవుడ్ లో హాట్ టాపిక్ అయ్యాయి. గౌతమ్ ను బుక్ చేసుకునేందుకు ఇప్పటికే ప్రొడ్యూసర్లు క్యూలో ఉన్నారనే టాక్ ఉంది. మరోవైపు శ్రద్ధాకు కూడా 'జెర్సీ' విజయంతో డిమాండ్ పెరిగింది. తాజాగా స్టార్ ప్రొడ్యూసర్ దిల్ రాజు నుండి శ్రద్ధాకు ఆఫర్ వచ్చిందని సమాచారం.

గీతా ఆర్ట్స్ బ్యానర్ లో నాగచైతన్య హీరోగా ఒక సినిమాను తెరకెక్కించేందుకు సన్నాహాలు జరుగుతున్నాయని చాలారోజుల నుంచి టాక్ ఉంది. కానీ అది లేట్ అయ్యే అవకాశం ఉందని దానికి బదులుగా దిల్ రాజు బ్యానర్లో ఒక సినిమా చేసేందుకు చైతు గ్రీన్ సిగ్నల్ ఇచ్చాడని ఫ్రెష్ టాక్ . చైతూను దిల్ రాజు బ్యానర్లోనే హీరోగా పరిచయం చేసిన సంగతి తెలిసిందే. కానీ అప్పటి నుంచి ఇప్పటివరకూ వారు మళ్ళీ కలిసి పనిచేయలేదు. చైతు చాలా రోజుల నుండి రాజుగారి బ్యానర్లో చేసేందుకు రెడీగా ఉన్నాడట. మరోవైపు దిల్ రాజు కూడా ఈ చైతు సినిమాకోసం ప్రయత్నాలు మొదలుపెట్టాడట. కొద్దిరోజుల క్రితం శశి అనే నూతన దర్శకుడు తన కథతో రాజుగారిని మెప్పించాడట. ఈ ప్రాజెక్టునే చైతూకు సెట్ చేయాలని చూస్తున్నాడట. ఈ సినిమాలో చైతూ కు హీరోయిన్ గా శ్రద్ధా శ్రీనాథ్ ను అనుకుంటున్నారట.

దిల్ రాజు బ్యానర్లో చైతూ సినిమా అంటే ఖచ్చితంగా క్రేజీ కాంబినేషనే. ఇలాంటి సినిమాలో హీరోయిన్ గా ఛాన్స్ వస్తే శ్రద్ధా కెరీర్ టాలీవుడ్ లో సెట్ అయినట్టే. ఎందుకంటే దిల్ రాజు కు హీరోయిన్లను ఫ్యూచర్ ప్రాజెక్టులలో రిపీట్ చేసే అలవాటు ఉంది. దిల్ రాజు-చైతు సినిమా వివరాలు త్వరాలోనే వెల్లడవుతాయి.