టూర్ లోనే బర్త్ డే పైసా వసూల్

ప్రస్తుతం సౌత్ సీనియర్ హీరోయిన్ పేరు చెప్పమంటే.. టక్కుమని అందాల భామ శ్రియా శరన్ గుర్తుకు రావాల్సిందే. ఈ ఏడాది ప్రారంభంలో బాలయ్య వందో చిత్రం గౌతమి పుత్ర శాతకర్ణిలో వశిష్టీ దేవి పాత్రలో మెప్పించి.. కమర్షియల్ హిట్ అందుకున్న ఈ భామకు.. మళ్లీ కాలం కలిసి రావడం లేదు. శాతకర్ణితో హిట్ ఇచ్చిన బాలయ్యే.. పైసా వసూల్ సినిమా మూవీతో డిజాస్టర్ ను ఖాతాలో వేశాడు. అయితే.. ఈ భామకు డిమాండ్ మాత్రం ఇప్పటికీ బాగానే ఉంది.

ప్రస్తుతం శ్రియ ఛారిటీ ఈవెంట్ కోసం త్వరలోనే లండన్ టూర్ వెళ్లబోతోంది. బ్రిటిష్ ఏషియా ట్రస్ట్ ఆ పర్యటనను నిర్వహిస్తోండగా.. దక్షిణ ఆసియాలో పేదరికాన్ని ఎదుర్కొనేందుకు ఈ సంస్థ తన వంతుగా సాయం చేస్తూంటుంది. ఆ సంస్థ ఆహ్వానం మేరకు పలు ప్రచార కార్యక్రమాల్లో పాల్గొనడానికి శ్రియ ఫారిన్ టూర్ వెళ్లనుంది. ఏ మాత్రం గ్యాప్ లేకుండా గడిపే ఆ బిజీ షెడ్యూల్ మధ్యలోనే.. శ్రియా శరణ్ తన పుట్టిన రోజును కూడా జరుపుకోనుండడం విశేషం. అంటే.. ఇటు తన సొంత ఖర్చులు పెద్దగా పెట్టుకోవాల్సిన అవసరం లేకుండానే.. టూర్ ఖర్చులతో పాటు బర్త్ డే ఎక్స్ పెన్సెస్ కూడా అమ్మడికి కలిసొచ్చేస్తాయన్న మాట.

పెద్ద స్టార్స్ తో అవకాశాలు ఎక్కువగా అందకపోయినా.. శ్రియా ఇప్పుడు పలు కార్యక్రమాలకు బ్రాండ్ అంబాసిడర్ గా వ్యవహరిస్తూ.. తన పాపులారిటీ కంటిన్యూ చేస్తోంది. ప్రస్తుతం కార్తీక్ నరేన్ దర్శకత్వంలో రూపొందుతోన్న నరగసూరన్ అనే చిత్రంలో శ్రియ నటిస్తోంది. అరవింద్ స్వామి.. సందీప్ కిషన్ లు.. ఈ మూవీలో ప్రధాన పాత్రలు పోషిస్తున్నారు.