'ఆర్.ఆర్.ఆర్'లో నటిస్తున్నానని కంఫర్మ్ చేసిన స్టార్ హీరోయిన్..!

సౌత్ సినీ ఇండస్ట్రీలో ఒకప్పుడు స్టార్ హీరోయిన్ గా వెలుగొందింది శ్రీయా శరణ్. దశాబ్దకాలం పాటు ఇండస్ట్రీని ఏలిన శ్రియా పెళ్లి తర్వాత కూడా వరుస అవకాశాలను చేజిక్కించుకుంటూ దూసుకుపోయితోంది. హీరోయిన్ కి పెళ్లి తర్వాత సినీ కెరీర్ ఉండదు అనుకునే వారికి అది నిజం కాదని నిరూపించింది. ప్రస్తుతం క్వారంటైన్ లో తన భర్తతో కలిసి ఎంజాయ్ చేస్తున్న శ్రీయ తాజాగా సోషల్ మీడియాలో అభిమానులతో చిట్ చాట్ చేసింది. వారు అడిగిన ప్రశ్నలకు సమాధానాలు ఇచ్చింది. ఈ సందర్భంగా ఫ్యూచర్ ప్రాజెక్ట్స్ గురించి తెలియజేస్తూ రాజమౌళి తెరకెక్కిస్తున్న 'ఆర్.ఆర్.ఆర్' సినిమాలో నటించబోతున్నట్లు వెల్లడించింది. గ‌త కొన్ని రోజులుగా ఆర్.ఆర్.ఆర్ చిత్రంలో శ్రియ న‌టిస్తుంద‌ని వార్త‌లు వ‌స్తున్న విష‌యం తెలిసిందే. ఇప్పుడు ఆ వార్తలు నిజమే అని కంఫర్మ్ చేసింది శ్రీయా శరణ్. ఈ చిత్రంలో అజయ్ దేవగణ్ కి జోడీగా కనిపించబోతున్నానని చెప్పుకొచ్చింది. అంతేకాకుండా ఆర్.ఆర్.ఆర్ లో అజయ్ దేవగణ్ - శ్రీయాల ఎపిసోడ్ ప్లాష్ బ్యాక్ లో వస్తుందని రివీల్ చేసింది. ఇప్పటికే బాలీవుడ్ హీరోయిన్ అలియా భట్.. హాలీవుడ్ హీరోయిన్ ఒలీవియా నటిస్తున్న ఈ సినిమాలో ఒకప్పటి స్టార్ హీరోయిన్ శ్రీయా శరణ్ కూడా కనిపించబోతోందన్నమాట.

కాగా శ్రీయా రాజమౌళి దర్శకత్వంలో నటించడం ఇదేమీ మొదటిసారి కాదు. గతంలో యంగ్ రెబల్ స్టార్ ప్రభాస్ - రాజమౌళి కాంబినేషన్ లో వచ్చిన 'ఛత్రపతి' సినిమాలో హీరోయిన్ గా నటించింది శ్రియా. ఈ సినిమా ఆమెకు మంచి గుర్తింపుని తీసుకొచ్చింది. ఇప్పుడు మరోసారి జక్కన్న సినిమాలో నటించబోతోంది. కాగా దర్శకేంద్రుడు రాజమౌళి రెండేళ్ల విరామం తీసుకొని తెరకెక్కిస్తున్న 'ఆర్.ఆర్.ఆర్' సినిమా కోసం యావత్ సినీ అభిమానులు ఆసక్తిగా ఎదురు చూస్తున్నారు. స్టార్ హీరోలైన ఎన్టీఆర్ - రామ్ చరణ్ ఈ సినిమాలో స్క్రీన్ షేర్ చేసుకోబోతున్నారు. తారక్ 'కొమరం భీమ్'గా నటిస్తుండగా చరణ్ 'అల్లూరి సీతారామ రాజు'గా కనిపిస్తున్నాడు. ఈ భారీ మల్టీస్టారర్ ని డీవీవీ దానయ్య భారీ బడ్జెట్ తో నిర్మిస్తున్నారు. వచ్చే ఏడాది రిలీజ్ కానున్న ఈ సినిమా ఇప్పటికి 70 శాతం చిత్రీకరణ పూర్తి చేసుకుంది. పాన్ ఇండియా మూవీగా రూపొందుతున్న ఈ సినిమా పలు భారతీయ భాషల్లో విడుదల కానుంది.