రోడ్డుపై రచ్చ చేసిన శ్రియా

సినిమా స్క్రీన్ పై ఒకసారి కనిపిస్తే.. ఇక దాదాపుగా సెలబ్రిటీలు అయిపోయినట్లే. ఇప్పటి కుర్రకారులో గ్లామర్ ప్రియులు మరీ ఎక్కువైపోవడంతో.. చిన్నా చితకా సినిమాల్లో నటించిన నటులను కూడా తెగ గుర్తు పెట్టేసుకుంటున్నారు. అలాంటిది ఓ సీనియర్ హీరోయిన్ సడెన్ గా రోడ్డు మీద ప్రత్యక్షం అయితే పరిస్థితి ఎలా ఉంటుంది? సీనియర్ బ్యూటీ శ్రియా శరణ్ కు కూడా ఇదే డౌట్ వచ్చినట్లుంది. అందుకే సడెన్ గా హైద్రాబాద్ లో నడిరోడ్డుపై ప్రత్యక్షం అయిపోయింది.

బుధవారం రోజున హఠాత్తుగా హైద్రాబాద్ జూబిలీ హిల్స్ రోడ్ నెంబర్ 1లో.. రోడ్డు పక్కన నడుస్తూ కనిపించింది శ్రియ. అదే సమయంలో కొందరు ఫోటోగ్రాఫర్స్ ఆమెను ఫోటోలు తీస్తూ కనిపించారు. ఈ విషయాన్ని ఆసక్తిగా గమనించిన జనాలు.. ఆమె శ్రియ అని గుర్తు పట్టేందుకు పెద్దగా టైం తీసుకోలేదు. అంతే ఆమె దగ్గరకు వచ్చి సెల్ఫీల కోసం క్యూ కట్టేశారు. అలా నడుస్తూనే కొందరికి సెల్ఫీ ఫోజులు ఇచ్చిన శ్రియ.. ఓ ప్రొడ్యూసర్ ఆఫీస్ లోకి తుర్రుమంది. జనాలు ఎక్కువగా గుమిగూడే లోపే సేఫ్ ప్లేస్ లోకి వెళ్లిపోయింది కాబట్టి సరిపోయింది కానీ.. ఇలా శ్రియ లాంటి సీనియర్ హీరోయిన్ బిహేవ్ చేయడం ఎందుకో ఎవరికీ అర్ధం కాలేదు.

అలాగని ఆమె తన బాడీ గార్డ్స్ ని.. బౌన్సర్స్ ను కూడా వెంట బెట్టుకు రాలేదు. కేవలం పక్కన ఆమె పర్సనల్ అసిస్టెంట్ తప్ప మరే భద్రతా లేకుండానే జనాల్లోకి వచ్చేసే ధైర్యం శ్రియ చేయడాన్ని చాలా మంది ఆశ్చర్యంగా చెప్పుకుంటున్నారు. చెప్పుకోడానికి ఇది డేరింగ్ గా ఉంటుందేమో కానీ.. ఏదైనా తేడా వచ్చి కాసింత తొక్కిసలాట జరిగినా.. అప్పుడు బాధపడ్డం తప్ప మరేమీ చేయలేమని హెచ్చరిస్తున్నారు కూడా.