శ్రుతి మ‌రో పాటేసుకొంది!

హీరోయిన్‌గా క్ష‌ణం తీరిక లేకుండా గ‌డుపుతోంది శ్రుతిహాస‌న్‌. అటు బాలీవుడ్‌లోనూ, ఇటు సౌత్‌లోనూ స్టార్ హీరోల సినిమాల్లో ఛాన్సులు అందుకొంటూ దుమ్ము దులుపుతోంది. ముంబై, చెన్నై, హైద‌రాబాద్‌ల చుట్టూ తిర‌గ‌డానికే స‌మ‌యం స‌రిపోవ‌డం లేదు. అయినా స‌రే.. వీలు చూసుకొని పాట‌లు కూడా పాడుతుంటుంది. సంగీతం అంటే చెవి కోసుకొనే శ్రుతి మొద‌ట మ్యూజిషియ‌న్‌గానే ప‌రిశ్ర‌మ‌లోకి అడుగుపెట్టింది. తండ్రి సినిమాల‌కి మ్యూజిక్ చేసింది. అప్ప‌ట్లో అంతా ఆమెని మ్యూజిక్ డైరెక్ట‌ర్‌గానే స్థిర‌ప‌డుతుంద‌ని ఊహించారు. కానీ శ్రుతి అందం ఆమెని హీరోయిన్‌ని చేసేదాకా వ‌ద‌ల్లేదు. స్వ‌త‌హాగా శ్రుతికి న‌ట‌న‌పై కూడా ఆస‌క్తి ఉండ‌టంతో హీరోయిన్ అయిపోయింది. ఎంత హీరోయిన్ అయినా సంగీతానికి మాత్రం దూరం కానంటూ ఉంటుంది శ్రుతి.

ముఖ్యంగా త‌న సినిమాల్లో తాను పాడుకోవ‌డానికే ఎక్కువ‌గా ఆస‌క్తి చూపుతుంటుంది. తెలుగుతోపాటు, ప‌లు త‌మిళ చిత్రాల్లో పాట‌లు పాడుకొంది శ్రుతి. తాజాగా మ‌రోసారి ఆమె గొంతు విప్పింది. విజ‌య్ కథానాయ‌కుడిగా తెర‌కెక్కుతున్న `పులి` కోసం విజ‌య్‌తో క‌లిసి శ్రుతిహాస‌న్ ఓ డ్యూయెట్ సాంగ్ పాడింది. దేవిశ్రీప్ర‌సాద్ ఈ చిత్రానికి సంగీతం అందిస్తున్నాడు. మామూలుగా దేవి సినిమాల్లో ఒక్క పాటైనా సెల‌బ్రిటీలు పాడుతుంటారు. ఇక శ్రుతిహాస‌న్‌లాంటి సింగ‌ర్ దొరికితే వ‌దిలిపెడ‌తాడా? ప‌ట్టుబ‌ట్టి మ‌రీ ఆమెతో పాడించేయ‌డూ! శ్రుతిని దేవి పాట అడ‌గ్గానే `ఓ యెస్...` అని చెప్పింద‌ట‌. పాట రికార్డింగ్ స‌మ‌యంలో దేవిశ్రీతో క‌లిసి తీసుకొన్న ఫొటోని ట్విట్ట‌ర్‌లో పోస్ట్ చేస్తూ తాను పాట పాడిన విష‌యాన్ని బ‌య‌ట‌పెట్టింది శ్రుతి.