సైలెంట్ గా కానిచ్చేసింది.. శృతి మరో ప్రయోగం

కమల్ హాసన్‌ వారసురాలైనా శృతి హాసన్ ఎప్పుడు కూడా తండ్రి పేరును వాడుకుని స్టార్‌ డమ్ దక్కించుకునే ప్రయత్నం చేయలేదు. మల్టీ ట్యాలెంటెడ్ అని నిరూపించుకోవడంతో పాటు హీరోయిన్ గా స్టార్‌ డమ్‌ దక్కించుకుంది. కేవలం ఒకటి రెండు భాషల్లో కాకుండా సౌత్‌ లో మరియు నార్త్‌ లో అన్ని చోట్ల కూడా మంచి గుర్తింపును దక్కించుకుంది. హీరోయిన్ గా కంటే నటిగా ఈమె పేరును దక్కించుకుంది. నటిగా తనను తాను నిరూపించుకుంటూ కొత్త ప్రయోగాలు చేస్తూ వచ్చింది. మొదటి సినిమాలోనే బికినీతో కనిపించిన శృతి హాసన్‌ ఆ తర్వాత ఐరన్ లెగ్ అనే ముద్ర ను వేసుకుంది. గబ్బర్ సింగ్ తో అనూహ్యంగా లక్ కలిసి వచ్చి సూపర్‌ హిట్‌ అయ్యింది. అప్పటి నుండి ఇప్పటి వరకు శృతి హాసన్‌ జోరు కంటిన్యూ అవుతూనే ఉంది. హీరోయిన్ గా ఈమెకు బ్యాక్ టు బ్యాక్ ఆఫర్లు వస్తున్నా కూడా ఆచి తూచి సినిమాలను ఎంపిక చేసుకుంటుంది. ఐటెం సాంగ్ లు మొదలుకుని గెస్ట్‌ రోల్‌ వరకు శృతి హాసన్‌ ను రకరకాలుగా చూశాం. పిట్ల కథలు అనే వెబ్‌ సిరీస్ లో కూడా ఈమెను చూశాం. హీరోయిన్ గా సక్సెస్ అయిన శృతి హాసన్ వెబ్‌ సిరీస్ తో మాత్రం నిరాశ పర్చింది. మొదటి వెబ్‌ సిరీస్‌ నిరాశ పర్చినా మరోసారి ఆ దిశగా అడుగులు వేస్తోంది.

పిట్టకథలు వెబ్‌ సిరీస్ లో ఒక ఎపిసోడ్‌ లో మాత్రమే కనిపించిన శృతి హాసన్‌ 'బెస్ట్‌ సెల్లర్' అనే వెబ్‌ సిరీస్‌ లో పూర్తి స్థాయి నిడివి ఉన్న పాత్రలో కనిపించబోతుంది. బెస్ట్‌ సెల్లర్ వెబ్‌ సిరీస్ కథ మొత్తం కూడా శృతి హాసన్‌ చుట్టు తిరుగుతుందట. స్కిన్ షో కాకుండా ఒక మంచి నటనకు ఆస్కారం ఉన్న పాత్రను ఈ వెబ్‌ సిరీస్ లో శృతి హాసన్ చేసినట్లుగా పోస్టర్ ను చూస్తుంటే అర్థం అవుతుంది. బెస్ట్‌ సెల్లర్ వెబ్‌ సిరీస్ ను సైలెంట్‌ గా ముగించేశారు. షూటింగ్‌ జరుగుతున్న సమయంలో ఈ వెబ్‌ సిరీస్ గురించి పెద్దగా హడావుడి చేయలేదు. ఇప్పుడు విడుదల చేయబోతున్నట్లుగా ప్రకటించి అందరిని ఆశ్చర్యపర్చారు. అమెజాన్‌ ప్రైమ్‌ వీడియోలో ఈనెల 18వ తారీకున స్ట్రీమింగ్‌ చేయబోతున్నట్లుగా అధికారికంగా ప్రకటించారు. బెస్ట్‌ సెల్లర్ లో శృతి హాసన్‌ చాలా పద్దతైన కాస్ట్యూమ్స్ లో కనిపించబోతున్నట్లుగా పోస్టర్ ను చూస్తుంటే అర్థం అవుతుంది. హేమా హేమీలు అయిన మిథున్‌ చక్రవర్తి మరియు దీపక్‌ వంటి నటులతో స్క్రీన్‌ ను శృతి హాసన్ షేర్‌ చేసుకుంది.

మొదటి వెబ్‌ సిరీస్ ప్లాప్ అవ్వడంతో రెండవ వెబ్‌ సిరీస్ కు ధైర్యం చేయడం చాలా అరుదుగా జరుగుతుంది. ఒక వైపు హీరోయిన్‌ గా బిజీగా ఉన్న సమయంలో ప్లాప్‌ అయ్యే వెబ్‌ సిరీస్ లు అవసరమా అని చాలా మంది అనుకుంటారు. కాని శృతి హాసన్‌ అలా ఎప్పుడు అనుకోదు. ప్లాప్‌ అయినా పట్టుదలతో సక్సెస్‌ అయ్యే మనస్థత్వం ఆమెది. అందుకే వెబ్‌ సిరీస్ లో కూడా తనను తాను నిరూపించుకునేందుకు ప్రయత్నాలు చేసింది. అందుకు గాను ఏకంగా వెబ్ సిరీస్ ను లీడ్‌ రోల్‌ లో చేసింది. ఈ వెబ్‌ సిరీస్ ప్రయోగం ఆమె కెరీర్ లో ఖచ్చితంగా మరింతగా మరుపురాని విజయాన్ని సొంతం చేసి పెడుతుంది అని ఆమె భావిస్తుంది.

హిందీలో స్ట్రీమింగ్‌ అవ్వబోతున్న ఈ బెస్ట్‌ సెల్లర్‌ వెబ్‌ సిరీస్ ను ప్రముఖ రచయిత రవి సుబ్రహ్మణియన్‌ రచించిన నవల బెస్ట్‌ సెల్లర్ నుండి తెరకెక్కించడం జరిగింది. ఒక సాదారణ యువతి జర్నలిస్ట్‌ గా మారి సమాజంపై జరుగుతున్న చెడుపై పోరాడే కథతో ఈ వెబ్ సిరీస్ ఉంటుందని అంటున్నారు. ఇక శృతి హాసన్‌ మరో వైపు బిగ్గెస్ట్‌ ఇండియన్ మూవీ సలార్‌ లో ప్రభాస్ కు జోడీగా నటిస్తున్న విషయం తెల్సిందే. మరో వైపు బాలకృష్ణ కు జోడీగా గోపీచంద్‌ మలినేని దర్శకత్వంలో కూడా నటిస్తోంది. ఇక హిందీలో మరియు తమిళంలో కూడా ఈ అమ్మడు సినిమాలు చేస్తూనే ఉంది. ఇంత బిజీగా ఉండి కూడా ప్రయోగాత్మకంగా వెబ్‌ సిరీస్ ను చేసింది. మరి ఆ వెబ్‌ సిరీస్ ఎలాంటి ఫలితాన్ని ఆమెకు అందిస్తుంది అనేది చూడాలి.