‘గబ్బర్ సింగ్’కూ ఇలాగే అన్నారు-శ్రుతి

‘ప్రేమమ్’ మలయాళ వెర్షన్ కు ప్రధాన ఆకర్షణగా నిలిచింది సాయి పల్లవి పోషించిన మలార్ పాత్ర. లక్షల మంది ఆ పాత్రతో ప్రేమలో పడిపోయారు. సాయి పల్లవికి.. మలార్ పాత్రకు మ్యాడ్ ఫ్యాన్స్ అయిపోయారు. ఐతే ఆ పాత్రపై ప్రేమ మరీ ఎక్కువైపోయి.. తెలుగులో ఆ క్యారెక్టర్ చేస్తున్న శ్రుతి హాసన్ మీద పడ్డారు. ఆమెను సోషల్ మీడియాలో అదే పనిగా ట్రోల్ చేశారు. తన మీద విమర్శలు గుప్పించారు. కొంతవరకు తెలుగు ‘ప్రేమమ్’ మీద కూడా వ్యతిరేకత చూపించారు. ఐతే ఈ నెగెటివిటీని తట్టుకుని పాజిటివ్ బజ్ మధ్య ఈ రోజే ప్రేక్షకుల ముందుకొస్తోంది ‘ప్రేమమ్’. ఈ నేపథ్యంలో శ్రుతి ఓ ఇంటర్వ్యూలో మాట్లాడుతూ.. తన గురించి జరిగిన వ్యతిరేక ప్రచారం గురించి స్పందించింది.

‘‘నేను ఏ రీమేక్ సినిమాలో చేసినా.. ఈమె ఈ పాత్రను ఎలా చేస్తుంది అంటూ సందేహాలు వ్యక్తం చేస్తుంటారు జనాలు. ఇందకుముందు ‘గబ్బర్ సింగ్’ విషయంలోనూ ఇలాగే జరిగింది. ‘ప్రేమమ్’ సినిమాకు సంబంధించి సందేహాలు వ్యక్తం చేసినట్లే అప్పుడూ చేశారు. చాలా ప్రశ్నలు ఎదురయ్యాయి. ఇలా చేస్తే ఎవరూ ఏ సినిమానూ రీమేక్ చేయలేరు. అయితే ప్రతి ఒక్కరికీ ఒక శైలి ఉంటుంది. నేను ఎవరినీ సరిగా అనుకరించలేను. నా శైలిలో నేను చేస్తాను. ‘ప్రేమమ్’ సినిమా.. నా పాత్ర కూడా ఒరిజినల్ కు జిరాక్స్ కాపీ కాదు. డైరెక్టర్ చందూ మొండేటి.. సినిమాటోగ్రాఫర్ కార్తీక్ ఈ కథను డిఫరెంట్ అప్రోచ్ తో డీల్ చేశారు. తెలుగులో ఈ సినిమా ఫ్లేవర్ మరోలా ఉంటుంది. తెలుగు వెర్షన్ ఇక్కడి ప్రేక్షకులకు ప్రత్యేకమైన అనుభూతిని పంచుతుంది’’ అని శ్రుతి చెప్పింది.

Like Us on Facebook : https://www.facebook.com/Tupakidotcom/