గోపీచంద్ కోసం శ్రుతి హాసన్

నిన్న.. ఈ రోజు.. రేపు ముహూర్తాలు మహ బాగా ఉన్నట్లున్నాయి. ఓపక్క సినిమాల ప్రారంభోత్సవాలు.. మరోపక్క మోషన్ పోస్టర్ల రిలీజ్‌.. ఇంకా ఏవేవో సినిమా కార్యక్రమాలతో మోతెక్కిపోతోంది టాలీవుడ్. నిన్న పవన్ కళ్యాణ్ తన కొత్త సినిమా మొదలుపెడితే.. ఈ రోజు వరుణ్ తేజ్ కూడా ‘మిస్టర్’కు కొబ్బరికాయ కొట్టాడు. అల్లు శిరీష్ సైతం తన కొత్త సినిమాను ఈ రోజే ఆరంభించబోతున్నాడు. ఇక ఇవాళ ఉదయం మహేష్ బాబు ‘బ్రహ్మోత్సవం’ మోషన్ పోస్టరుతో అభిమానుల్ని ముురిపించాడు.

సాయంత్రం యాక్షన్ హీరో గోపీచంద్ కొత్త సినిమా ‘ఆక్సిజన్’ మోషన్ పోస్టర్ విడుదల కాబోతోంది. స్టార్ హీరోయిన్ శ్రుతి హాసన్ చేతుల మీదుగా ఈ పోస్టర్ రిలీజవబోతుండటం విశేషం. ఇప్పటికే ‘ఆక్సిజన్’ ఫస్ట్ లుక్ పోస్టర్ ని జనాలకు పరిచయం చేశారు. ఐతే దాంతో సరిపెట్టకుండా మోషన్ పోస్టర్ కూడా తెస్తున్నారు. ఫస్ట్ పోస్టరుకి సరైనా రెస్పాన్స్ రాని నేపథ్యంలో దీన్ని కొంచెం వైవిధ్యంగా తీర్చిదిద్దారని సమాచారం.

సీనియర్ ప్రొడ్యూసర్ ఎ.ఎం.రత్నం ఈ చిత్రాన్ని నిర్మిస్తుండగా.. ఆయన కొడుకు జ్యోతికృష్ణే దర్శకత్వం వహిస్తున్నాడు. రత్నం దాదాపు దశాబ్దం తర్వాత తెలుగులోకి ఈ సినిమాతోనే పునరాగమనం చేస్తున్నాడు. దర్శకుడిగా జ్యోతికృష్ణ తొలి సినిమా ‘నీ మనసు నాకు తెలుసు’ పెద్ద డిజాస్టర్ అయింది. ఈసారి సక్సెస్ కొట్టితీరాలన్న పట్టుదలతో ఉన్నాడతను. జగపతిబాబు కీలక పాత్ర పోషిస్తున్న ఈ సినిమాలో రాశి ఖన్నాతో పాటు మలయాళీ భామ అను ఇమ్మాన్యుయెల్ హీరోయిన్లుగా నటిస్తున్నారు.