శృతి ఆట ఆడుతుందా? ఆడదా?

శ్రుతి హాసన్ పుట్టి పెరిగింది కోలీవుడ్ లో.. మొదటి సినిమా చేసింది బాలీవుడ్ లో అయినా ఆమెకు మొదటి కమర్షియల్ హిట్ వచ్చింది మాత్రం టాలీవుడ్ లోనే. పవర్ స్టార్ పవన్ కళ్యాణ్ సూపర్ హిట్ మూవీ గబ్బర్ సింగ్ శ్రుతిహాసన్ కెరీర్ ను మలుపు తిప్పింది. ఆ తరవాత వరసగా పెద్ద హీరోలతో సినిమాలు చేసింది. ఆమె తెలుగులో చివరగా కనిపించింది కూడా పవన్ సినిమాతోనే కావడం విశేషం. కాటమరాయుడు తరవాత శ్రుతి టాలీవుడ్ నుంచి వచ్చిన ఏ ఆఫర్ కు ఓకే చెప్పలేదు.

తాజాగా నాని హీరోగా నటించబోయే స్పోర్ట్స్ డ్రామా జెర్సీ సినిమాతో శ్రుతి టాలీవుడ్ కు తిరిగి రానుందనే న్యూస్ టాలీవుడ్ లో వినిపించింది. కానీ లేటెస్ట్ గా శ్రుతి సన్నిహితులు చెబుతున్న మాటేమిటంటే జెర్సీ సినిమాలో నటించడానికి ఇంతవరకు ఆమె ఓకే చెప్పనేలేదట. ఈమధ్య సినిమాలకు కాస్త గ్యాపిచ్చిన శ్రుతి టాలీవుడ్ లో తిరిగి అడుగుపెట్టడానికి మంచి కమ్ బ్యాక్ మూవీ కోసం చూస్తున్న మాట వాస్తవవమే అయినా జెర్సీ మూవీ విషయంలో ఇంకా ఏ నిర్ణయమూ తీసుకోలేదని చెబుతున్నారు.

మళ్లీరావా ఫేం గౌతమ్ తిన్ననూరి దర్శకత్వంలో తెరకెక్కే జెర్సీ మూవీని సితార ఎంటర్ టెయిన్ మెంట్స్ బ్యానర్ లో నిర్మించనున్నారు. ఇంతకుముందు శ్రుతి ఇదే బ్యానర్ లో నాగచైతన్య హీరోగా చేసిన ప్రేమమ్ సినిమాలో నటించింది. తమ బ్యానర్ తో ఉన్న మంచి పరిచయాన్ని దృష్టిలో పెట్టుకుని జెర్సీ మూవీలో నటించేందుకు ఓకే చెబుతుందనే నమ్మకంతోనే నిర్మాతలు ఉన్నారట. శ్రుతి నానికి ఓకే చెబుతుందా... లేక పెద్ద హీరో సినిమా కోసం ఎదురుచూస్తుందా వేచి చూడాలి.