పవన్ కు ఆమె హ్యాండిచ్చేసిందా?

రాధ.. విజయశాంతి.. రాధిక.. సుహాసిని లాంటి హీరోయిన్లు ఒక్కొక్కరితో రెండంకెల సినిమాలు చేశాడు మెగాస్టార్ చిరంజీవి. విజయశాంతి.. రాధలతో అయితే 20 సినిమాలకు పైగా జంటగా నటించాడు. కానీ ఆయన తమ్ముడు పవన్ కళ్యాణ్ మాత్రం చిత్రంగా 20 ఏళ్ల కెరీర్లో తన భార్యగా మారిన రేణు దేశాయ్ తో మినహాయిస్తే ఇంకే హీరోయిన్ తోనూ ఒకటికి మంచి సినిమాలు చేయలేదు. గతంతో పోలిస్తే ఇప్పుడు స్టార్ హీరోలు హీరోయిన్లను రిపీట్ చేయడం తగ్గినప్పటికీ.. పవన్ రేణు మినహా వేరెవ్వరితోనూ రెండోసారి పని చేయకపోవడం అన్నది ఆశ్చర్యం కలిగించే విషయం. రేణుతో కూడా అప్పటికే వ్యక్తిగత అనుబంధం ఉండబట్టే ఆమెతో రెండో సినిమా చేశాడు. అది కూడా స్వీయ దర్శకత్వంలో చేసిన సినిమా కాబట్టి.. తనకు అన్ని రకాలుగా అనువుగా ఉంటుందని రేణును హీరోయిన్ గా పెట్టుకున్నాడు.

పవన్ ఇన్నాళ్లూ ఉద్దేశపూర్వకంగానే ఇలా ఒకసారి పని చేసిన హీరోయిన్ తో ఇంకోసారి పని చేయకూడదని రూల్ ఏమైనా పెట్టుకున్నాడో లేదో కానీ.. ఈ అరుదైన రికార్డు బ్రేక్ అయ్యేట్లు కనిపించింది ఈ మధ్య. ‘గబ్బర్ సింగ్’లో తన సరసన నటించిన శ్రుతి హాసన్ ను తన కొత్త సినిమాకు ఫైనలైజ్ చేశాడు పవన్. ఇది నెలన్నర కిందటి మాట. ఐతే ఇప్పుడు పరిస్థితులు మారిపోయాయి. నెల కిందటే మొదలవ్వాల్సిన సినిమా.. ఇప్పటిదాకా పట్టాలెక్కలేదు. ఎస్.జె.సూర్య ఈ సినిమా నుంచి తప్పుకున్నాడు. డాలీ లైన్లోకి వచ్చాడు. శ్రుతి ఇంతకుముందు అనుకున్న ప్రకారం ఈ సినిమాకు డేట్లు సర్దుబాటు చేసే పరిస్థితి లేదు. ఆమెకు వేరే కమిట్మెంట్లు ఉన్నాయి. పవన్ సినిమా ఎప్పుడు మొదలై.. ఎప్పుడు ముగుస్తుందో క్లారిటీ లేదు. దీంతో ఈ సినిమాకు ఆమె గుడ్ బై చెప్పేసినట్లు సమాచారం. కాబట్టి పవన్ మరో హీరోయిన్ని వెతుక్కోక తప్పదు. మరి ఆల్రెడీ పని చేసిన ఇంకో హీరోయిన్ని చూసుకుంటాడా.. లేక కొత్త హీరోయిన్ని ట్రై చేస్తాడా.. చూద్దాం మరి.