అప్పుడు అవసరం కోసం.. ఇప్పుడు ఇష్టంతో..!

యూనివర్శిల్ స్టార్‌ కమల్‌ హాసన్‌ కూతురు శృతి హాసన్‌ మల్టీ ట్యాలెంటెడ్‌ అనే విషయం ప్రత్యేకంగా చెప్పనక్కర్లేదు. మ్యూజిక్ డైరెక్టర్‌.. సింగర్‌.. డాన్సర్‌.. హీరోయిన్‌.. మోడల్‌. ఇలా ప్రతి విభాగంలో కూడా తన బెస్ట్‌ ఇచ్చేందుకు ప్రయత్నిస్తూ ఉంటుంది. శృతి హాసన్‌ ఎప్పుడు కూడా తన తండ్రి పేరును ఉపయోగించుకునేందుకు ప్రయత్నించదు. సినిమాల్లో ఆమె ఎట్రీ ఇచ్చేందుకు కమల్‌ పేరు ఉపయోగపడింది తప్ప అంతకు మించి ఏమీ కమల్‌ పేరును ఎప్పుడు కూడా వినియోగించలేదు. అసలు శృతి హాసన్ కు హీరోయిన్ అవ్వాలనే ఆసక్తి లేదట. కాని డబ్బులు సంపాదించడం కోసం కొన్ని సినిమాలు చేసి ఆ తర్వాత మానేయాలనుకుందట. కాని అనూహ్యంగా సినిమా ల్లో నటించడం మొదలు పెట్టిన శృతి హాసన్ కు ఇష్టం ఏర్పడి ఇదే పర్మినెంట్‌ గా మార్చేసుకుందట.

తాజాగా ఒక చిట్‌ చాట్ లో శృతి హాసన్ మాట్లాడుతూ.. తనకు కాలేజ్ డేస్ నుండే మ్యూజిక్ బాండ్‌ ను ఏర్పాటు చేసి రాక్‌ స్టార్‌ అని పేరు తెచ్చుకోవాలని ఉండేది. కాని బాండ్ ఏర్పాటు చేయాలంటే మొదట చాలా డబ్బు అవసరం. ఆ డబ్బు సంపాదించడం కోసం హీరోయిన్ గా చేయాలనుకుందట. బాండ్ పెట్టేందుకు కావాల్సిన డబ్బును ఏర్పాటు చేయడం కోసం మొదట నటించిన తాను ఆ తర్వాత సినిమాలు అంటే ఇష్టంతో నటించడం మొదలు పెట్టాను అంటూ చెప్పుకొచ్చింది. హీరోయిన్ గా తనకు వచ్చిన ఛాలెంజ్‌ లను స్వీకరిస్తూ నటిగా మంచి పేరు దక్కించుకోవాలని కోరుకున్నాను అంటూ శృతి హాసన్ చెప్పుకొచ్చింది.

ఒకప్పుడు డబ్బు కోసం నటించాలనుకున్న సినిమాలు ఇప్పుడు నాకు ప్రపంచం అయ్యాయి అంటూ శృతి హాసన్‌ చెప్పుకొచ్చింది. ఇప్పటికి కూడా రాక్ స్టార్‌ అవ్వాలనే కోరిక మాత్రం అలాగే ఉందని చెప్పుకొచ్చింది. ప్రస్తుతం ప్రభాస్‌ కు జోడీగా భారీ పాన్ ఇండియా మూవీ సలార్ లో నటిస్తున్న విషయం తెల్సిందే. హిందీ.. తెలుగు తో పాటు పలు భాషల్లో నటిస్తూ ఉంది. కేవలం సినిమా లు మాత్రమే కాకుండా వెబ్‌ సిరీస్ లు మరియు మ్యూజిక్‌ ఆల్బంలను కూడా శృతి హాసన్ చేస్తూ ఉంది. మొత్తానికి శృతి హాసన్‌ కెరీర్ లో చాలా బిజీగా ఉంది. ఆమె కోట్లు సంపాదిస్తూ ఉంది. కమల్‌ కూతురుగా కాకుండా ఆమెకు సొంత బ్రాండ్ ఉంది అనడంలో సందేహం లేదు.