ఫైనల్ షెడ్యూల్ కోసం సెట్ లో అడుగుపెట్టిన 'శ్యామ్ సింగ రాయ్'

నేచురల్ స్టార్ నాని హీరోగా నటిస్తున్న లేటెస్ట్ మూవీ ''శ్యామ్‌ సింగ రాయ్‌''. ఇందులో ముగ్గురు అందమైన కథానాయికలు సాయి పల్లవి - కృతి శెట్టి - మడోన్నా సెబాస్టియన్‌ ఫీమేల్ లీడ్ రోల్స్ పోషిస్తున్నారు. ఇప్పటికే విడుదలైన నాని - సాయి పల్లవి ఫస్ట్ లుక్ విశేషంగా ఆకట్టుకున్నాయి. కలకత్తా బ్యాక్ డ్రాప్ లో పీరియాడికల్ హై వోల్టేజ్ యాక్షన్ ఎంటర్టైనర్ గా ఈ చిత్రాన్ని తీర్చిదిద్దుతున్నారు. తెలుగు ప్రేక్షకులకు సరికొత్త అనుభవాన్ని అందించేలా యునిక్ స్టోరీతో దర్శకుడు ఈ చిత్రాన్ని రూపొందిస్తున్నాడని తెలుస్తోంది. కరోనా సెకండ్ వేవ్ పరిస్థితుల నేపథ్యంలో నిలిచిపోయిన ఈ సినిమా షూటింగ్ హైదరాబాద్ లో తిరిగి ప్రారంభమైంది.

'శ్యామ్‌ సింగ రాయ్‌' కోసం కలకత్తా కాళీ మాత గుడితో సహా కొన్ని వీధులను గుర్తు చేసేలా దాదాపు 10 ఎకరాల విస్తీర్ణంలో ప్రత్యేకమైన సెట్ వేశారు. ఇటీవల కురిసిన భారీ వర్షాల కారణంగా దెబ్బతిన్న ఈ సెట్ ను ఆర్ట్ డైరెక్టర్ అవినాష్ కొల్లా పునరుద్ధరించారు. ఈ సినిమాకు సంబంధించిన ఫైనల్ షెడ్యూల్ షూటింగ్ ప్రస్తుతం ఈ సెట్ లోనే జరుగుతుంది. నాని పాల్గొంటున్న ఈ షూట్ లో కొన్ని కీలకమైన సన్నివేశాలను చిత్రీకరిస్తున్నారు. ఈ నేపథ్యంలో తాజాగా చిత్ర బృందం ఓ పోస్టర్ ని విడుదల చేసింది. ఇందులో ఖాకీ దుస్తుల్లో ఉన్న నాని బ్యాక్ సైడ్ లుక్ కనిపిస్తోంది. అతని చుట్టూ ఉన్న జనాలు చేతుల్లో త్రిశూలాలు పట్టుకొని ఉన్నారు.

కాగా, 'శ్యామ్‌ సింగ రాయ్‌' చిత్రాన్ని నిహారిక ఎంటర్టైన్మెంట్స్ బ్యానర్ పై వెంకట్‌ బోయనపల్లి నిర్మిస్తున్నారు. నాని కెరీర్లోనే భారీ బడ్జెట్ తో ఈ సినిమా తెరకెక్కుతోంది. సత్యదేవ్ జంగా దీనికి కథ అందిస్తున్నారు. మెలోడీ సాంగ్స్ స్పెషలిస్ట్ మిక్కీ జె.మేయర్‌ సంగీతం సమకూరుస్తున్నారు. సాను జాన్ వర్గేష్ సినిమాటోగ్రఫీ అందిస్తుండగా.. నవీన్ నూలి ఎడిటింగ్ బాధ్యతలు నిర్వర్తిస్తున్నారు. రవివర్మ యాక్షన్ కొరియోగ్రఫీ చేస్తున్నారు. ఈ చిత్రంలో జిషు సేన్‌ గుప్తా - రాహుల్‌ రవీంద్రన్‌ - మురళీ శర్మ - అభినవ్‌ గోమటం - లీలా శాంసన్ ఇతర కీలక పాత్రలు పోషిస్తున్నారు.