నానిని వేస్ట్ ఫెలో అనేసిన ఆ హీరో

టాలీవుడ్ యువ కథానాయకుడు నానికి.. తమిళ హీరో సిద్దార్థ్ కు మంచి స్నేహం ఉంది. ఒకప్పుడు తెలుగులో హీరోగా హవా సాగించి.. ఆ తర్వాత సొంతగడ్డకు వెళ్లిపోయిన సిద్ధు.. ఇటీవలే ‘గృహం’ సినిమాతో టాలీవుడ్లోకి రీఎంట్రీ ఇవ్వబోతుంటే.. నానీనే వచ్చి ఆ సినిమా థియేట్రికల్ ట్రైలర్ లాంచ్ చేశాడు. ఈ సినిమా ప్రమోషన్లకు తనవంతు సాయం చేశాడు కూడా.

ఇప్పుడు నాని నిర్మాణంలో తెరకెక్కుతున్న ‘అ’ సినిమా గురించి సిద్ధు ట్విటర్లో సరదాగా స్పందించాడు. వీళ్లిద్దరి మధ్య సాగిన సంభాషణ ఆసక్తి రేకెత్తించింది. ముందుగా నాని ఈ చిత్రంలో తాను వాయిస్ ఓవర్ ఇస్తున్న చేప పాత్రను పరిచయం చేస్తూ.. ‘‘నా తర్వాతి చిత్రంలో ఆసక్తికర పాత్రను పోషిస్తున్నా. కథ డిమాండ్‌ చేయడంతో ఈత కూడా నేర్చుకుంటున్నా’’ అని ట్వీట్‌ చేశాడు. దీనిపై సిద్ధు స్పందిస్తూ.. ‘‘ఈ సినిమా స్క్రిప్ట్‌ - బృందం గురించి గొప్ప విషయాలు విన్నాను. తొందరగా సినిమా విడుదల చేయి సోదరా’’ అన్నాడు.

ఇదిలా ఉంటే.. ఓ అభిమాని సిద్ధును ఈ సినిమాలో మీరు కూడా నటిస్తున్నారా అని అడిగాడు. బదులుగా సిద్ధు.. ‘‘నేనూ చెయ్యాలనే అనుకున్నా.. కానీ ఆ నిర్మాత వేస్ట్‌ ఫెలో. నన్ను రిజెక్ట్ చేశాడు’’ అని చమత్కరించాడు. దీనిపై నాని ఏమీ స్పందించలేదు. నానిని వేస్ట్ ఫెలో అనేశాడంటే సిద్ధుకు.. అతడికి ఎంత మంచి స్నేహం ఉందో అర్థం చేసుకోవచ్చు.