భయం కాన్సెప్ట్ పని చేసింది

తెలుగులో పూర్తిగా హారర్ సినిమాలను చూసి చాలాకాలమే అవుతోంది. ఈ మధ్యకాలంలో కొన్ని వస్తున్నా వాటిని హారర్ అనలేము. ఆ సినిమాలకు కామెడీని జతచేసి సినిమాలని వదులుతున్నారు. అయితే ఇప్పుడు హారర్ సినిమా అంటే ఇది అని తెలుగు ప్రేక్షకులకు మళ్లీ గుర్తు చేశాడు సిద్దార్థ్. రీసెంట్ గా విడుదలైన సిద్దార్థ్ - గృహం తెలుగులో మంచి రెస్పాన్స్ ని అందుకుంటోంది.

ఇంతకుముందే తమిళ్ హిందీలో రిలీజ్ అయ్యి మంచి ఆదరణను దక్కించుకున్న ఈ చిత్రం తెలుగులో కూడా పాజిటివ్ టాక్ ను సొంతం చేసుకుంది. ఎనిమిది సినిమాలు ఈ శుక్రవారం రిలీజ్ అయ్యాయి. ముందుగా థియేటర్స్ గురించి కొంచెం వార్ జరిగినా మొత్తానికి అన్ని సినిమాలు ఎవరి స్థాయిలో వారు రిలీజ్ చేసుకున్నారు. అయితే టాక్ బావుంటే థియేటర్స్ పెరుగుతాయని అందరు అనుకున్నారు. అయితే ప్రస్తుతం అన్ని సినిమాలకంటే సిద్దార్థ్ - గృహంకే మంచి టాక్ లభిస్తోంది.

చూసినవారంతా చాలా థ్రిల్ కి లోనయ్యామని ఫీల్ అవుతున్నారు. ఈ సోమవారం నుంచి సినిమాకు స్క్రీన్స్ పెరగనున్నాయని తెలుస్తోంది. సోషల్ మీడియాలో కూడా సినిమాపై పాజిటివ్ కామెంట్స్ వస్తుండడంతో కొన్ని ఏరియాల్లో సినిమా స్క్రీన్స్ ని పెంచేందుకు బయ్యర్స్ రెడీ అయ్యారు. మొత్తానికి సిద్దార్థ్ భయం కాన్సెప్ట్ బాగా పనిచేసింది. అన్ని భాషల్లో ఒకే సినిమాతో హిట్టు కొట్టి టెన్షన్ ని తగ్గించుకున్నాడు.