16న రేసులోకి మరో హీరో

ఈ నెల 16న నాని సినిమా ‘మజ్ను’ వస్తుందనుకున్నారు ముందు. కానీ ఆ సినిమా వారం వాయిదా పడి 23కు ఫిక్సయింది. దీంతో ఆ రోజు వేరే రెండు సినిమాలు షెడ్యూల్ అయ్యాయి. నారా రోహిత్ లాంగ్ డిలేయ్డ్ మూవీ ‘శంకర’తో పాటుగా అక్కినేని నాగార్జున స్వయంగా నిర్మించడంతో పాటు కీలక పాత్ర పోషించిన ‘నిర్మలా కాన్వెంట్’ కూడా 16నే విడుదలవుతున్నాయి. ఐతే పెద్ద సినిమాలేవీ రేసులో లేకపోవడంతో మరో చిన్న సినిమా కూడా ఆ రోజునే విడుదలకు ముహూర్తం చూసుకుంది. ఆ సినిమానే.. ‘సిద్ధార్థ’.

బుల్లితెరపై ‘మొగిలి రేకులు’ సీరియల్ తో సూపర్ పాపులర్ అయిన సాగర్ హీరోగా నటించిన సినిమా ఇది. ఈ సినిమాను 16న రిలీజ్ చేస్తున్నట్లు నిర్మాత దాసరి కిరణ్ కుమార్ ప్రకటించాడు. ఈ చిత్రానికి సెన్సార్ కూడా పూర్తయింది. ‘ఎ’ సర్టిఫికెట్ ఇచ్చారు. సినిమాలో వయొలెన్స్.. రొమాన్స్ పాళ్లు కొంచెం ఎక్కువే అని ట్రైలర్ చూస్తేనే అర్థమైంది. ఒకప్పుడు రౌడీయిజం చేసి.. ఆ తర్వాత ఆ జీవితాన్ని వదిలేసి సామాన్యుడిలా బతకబోయిన ఓ కుర్రాడిని గతం వెంటాడుతుంది. దీంతో మళ్లీ అతను రౌడీగా మారాల్సి వస్తుంది. అప్పుడు అతను ఎలా స్పందించాడనే కథాంశంతో ఈ చిత్రం తెరకెక్కింది. దయానందరెడ్డి దర్శకత్వం వహించిన ఈ సినిమాకు పరుచూరి బ్రదర్స్.. ఎస్.గోపాల్ రెడ్డి.. మణిశర్మ లాంటి అగ్రశ్రేణి టెక్నీషియన్లు పని చేయడం విశేషం.