కావేరిపై అలా అన‌లేదన్న శింబు

కావేరీ న‌దీ జ‌లాల వివాదంపై క‌ర్ణాట‌క‌ - త‌మిళనాడుకు చెందిన సినీతార‌లు కూడా స్పందిస్తున్నారు. కర్ణాట‌క‌లో రాష్ట్ర ప్ర‌భుత్వానికి మ‌ద్ద‌తుగా శాండిల్ వుడ్ నటీన‌టులు ఈ మ‌ధ్య‌నే ఒక ధ‌ర్నా కార్య‌క్ర‌మాన్ని చేప‌ట్టారు. ఇక‌, త‌మిళ స్టార్లు కూడా కావేరీ జ‌లాల‌ వివాదం విష‌యంలో ముఖ్య‌మంత్రి అమ్మ జ‌య‌ల‌లిత‌కు అండ‌గా నిలిచారు. న‌దీ జ‌లాల హ‌క్కుల ప‌రిర‌క్ష‌ణ కోసం అమ్మ తీసుకుంటున్న చర్య‌ల‌కు అండ‌గా ఉంటామ‌ని, ద‌క్షిణ భార‌త సినీ న‌టుల సంఘం అధికారికంగా ప్ర‌క‌టించింది. త‌మిళ ప్ర‌జ‌ల ఆకాంక్ష‌ల‌కు అనుగుణంగానే త‌మిళ న‌టులు న‌డుచుకుంటార‌ని న‌టులు ప్ర‌క‌టించారు. ఈ నేప‌థ్యంలో ప్ర‌ముఖ న‌టుడు శింబుకు సంబంధించిన ఒక వార్త ఈ మ‌ధ్య తెగ షికారు చేసింది. కావేరీ జ‌లాల వివాదం నేప‌థ్యంలో శింబు ఓ ప్ర‌క‌ట‌న చేశారంటూ క‌థ‌నాలు వ‌చ్చాయి.

నిజానికి, శింబూ కాస్త ముక్కుసూటిగా మాట్లాడే ర‌కం. ఏ అంశ‌మైనా ఓపెన్ గా మాట్లాడ‌తాడు. ఇత‌ర సెలెబ్రిటీల గురించి కూడా ఏమాత్రం మొహ‌మాటం లేకుండా కామెంట్లు చేసేస్తాడు. కావేరీ న‌దీ జ‌లాల విష‌య‌మై రెండు రాష్ట్రాల మ‌ధ్య వివాదం నెల‌కొన్న నేప‌థ్యంలో త‌న చిత్రాల‌ను క‌ర్ణాట‌క‌లో రిలీజ్ చేయ‌న‌ని శింబు అభిప్రాయ‌ప‌డ్డ‌ట్టు ఈ మ‌ధ్య కొన్ని వార్త‌లు వ‌చ్చాయి. ముఖ్యంగా సోష‌ల్ మీడియాలో ఈ ఇష్యూ బాగా స‌ర్క్యులేట్ అయింది. త‌మిళ‌నాడు చిత్ర వ‌ర్గాల్లో ఈ ఇష్యూ హాట్ టాపిక్ అయింది. ఈ నేప‌థ్యంలో శింబు స్పందించాడు. సినిమా విడుద‌ల‌కు సంబంధించి అలాంటి ప్ర‌క‌ట‌న‌ చేయ‌లేద‌ని శింబు స్ప‌ష్టం చేశాడు. కావేరీ న‌దీ జ‌లాల అంశంలో తాను జోక్యం చేసుకోలేద‌న్నాడు. శింబు ప్ర‌స్తుతం బ్యాంకాక్ లో ఉన్నాడు. అచ్చం యెంబాథు మదమైయద చిత్రంలో ఓ పాట షూటింగ్ అక్క‌డ జ‌రుగుతోంది.