ఎస్ 3.. నూన్ షో నుండి ఖాతా తెరిచాడు

‘సూర్య వెర్సస్ సూర్య’ లాంటి అభిరుచి ఉన్న సినిమాతో నిర్మాతగా తనకంటూ ఒక గుర్తింపు తెచ్చుకున్నాడు మాల్కాపురం శివకుమార్. వ్యాపార రంగం నుంచి సినిమాల్లోకి వచ్చిన ఆయనకు ఇక్కడ ఏమంత కలిసి రాలేదు. ‘సూర్య వెర్సస్ సూర్య’ ఫలితం జస్ట్ ఓకే అనిపించగా.. గత ఏడాది మంచు మనోజ్ హీరోగా ఆయన నిర్మించిన ‘శౌర్య’ దారుణమైన ఫలితాన్నిచ్చింది. ఆ సినిమాపై పెట్టిన పెట్టుబడి అంతా దాదాపుగా నేలపాలైంది. ఇక భారీ మొత్తానికి ‘సింగం-3’ హక్కులు తీసుకుంటే ఆ సినిమా వాయిదాల మీద వాయిదాలు పడి శివకుమార్ ను చాలా ఇబ్బంది పెట్టింది. సినిమా కోసం తీసుకున్న ఫైనాన్సుల వడ్డీలు తడిసి మోపెడయ్యాయి. పైగా సినిమాపై బజ్ అంతకంతకూ తగ్గుతూ వచ్చింది.

సింగం-3 కోసమని జనవరి 26న భారీ స్థాయిలో థియేటర్లు బుక్ చేసి పెట్టారు శివకుమార్. ఐతే ఆ సినిమా అనూహ్యంగా వాయిదా పడటంతో నైజాం వరకు తాను హక్కులు కొన్ని ‘లక్కున్నోడు’ సినిమా కోసం థియేటర్లను అలాగే అట్టిపెట్టేసుకున్నారు. కానీ ఆ సినిమా చేదు అనుభవాన్ని మిగిల్చింది. ఈ సినిమా హక్కుల్ని రూ.1.1 కోట్లకు కొంటే.. ఆయనకు ఏమీ వెనక్కి రాలేదట. అంతో ఇంతో వసూలైన మొత్తం థియేటర్ల రెంట్లకు కూడా సరిపోలేదని సమాచారం. ఐతే పెట్టుబడి తక్కువే కాబట్టి దాని గురించి ఆలోచించకుండా సింగం-3 మీద దృష్టిపెట్టారు శివకుమార్. కానీ ఈ చిత్రం గురువారం అనుకున్న ప్రకారం రిలీజవ్వలేదు. ఫైనాన్స్ క్లియర్ కాకపోవడమో.. మరో కారణమో కానీ.. మార్నింగ్ షోలు క్యాన్సిలయ్యాయి. డిజిటల్ వర్షన్ ప్లే చేయాలంటే కావల్సిన 'కీ' ఏదైతే ఉంటుందో.. అది రిలీజ్ చేయలేదని డిస్ర్టిబ్యూటర్ల ద్వారా తెలిసింది.

ఇక మధ్యాహ్నం తర్వాతైనా షోలు పడతాయో లేదో చెప్పలేని పరిస్థితి నెలకొన్న సందర్భంలో.. దాదాపు 12 గంటల నుండి అన్ని ఏరియాల్లోనూ నూన్ షోస్ మొదలయ్యాయ్. సింగం 3 కలక్షన్ల ఖాతా ఓపెనైంది. ఈ రోజుల్లో తొలి రోజు ఓపెనింగ్స్ ఎంత కీలకమో చెప్పాల్సిన పని లేదు. అందులోనూ శుక్రవారం నాగార్జున సినిమా ‘ఓం నమో వెంకటేశాయ’ విడుదలవుతోంది. కాబట్టి గురువారం కలెక్షన్లు మరింత కీలకం. ఒక్క షో క్యాన్సిల్ అయినా నష్టం చాలానే ఉంటుంది. మరి నూన్ షో నుండి సినిమా చాలా చోట్ల పడింది కాబట్టి.. ఎలాగొలా మ్యానేజ్ చేసి నాలుగు ఆటలు వేసేసి.. కలక్షన్లకు గండిపడకుండా చూసుకుంటారేమో తెలియాల్సి ఉంది.

Like Us on Facebook : https://www.facebook.com/Tupakidotcom/