ఆ ప్ర‌ముఖ‌ బాలీవుడ్ సింగ‌ర్ అరెస్ట్‌

ప్ర‌ముఖ బాలీవుడ్ సింగ‌ర్ య‌శ్ వ‌దాలిని అరెస్ట్ అయ్యారు. ఒక మ‌హిళ‌ను లైంగికంగా వేధించ‌ట‌మే కాదు.. అస‌భ్యంగా తాకారంటూ చేసిన ఫిర్యాదు ఆధారంగా ఆయ‌న్ను అరెస్ట్ చేసిన వైనం ఇప్పుడు సంచ‌ల‌నంగా మారింది. ఫ్రెండ్ పుట్టిన రోజు పార్టీకి హాజ‌రైన సంద‌ర్భంగా ఒక మ‌హిళ ప‌ట్ల అస‌భ్యంగా ఆయ‌న ప్ర‌వ‌ర్తించిన‌ట్లుగా బంగార్ న‌గ‌ర్ పోలీస్ స్టేష‌న్లో ఒక మ‌హిళ ఫిర్యాదు చేశారు.

ఫ్రెండ్ ఇంట్లో జ‌రిగిన బ‌ర్త్ డే పార్టీ వేడుక‌లో ఒక పాట విష‌య‌మై ఒక మ‌హిళ‌కు.. య‌శ్ మ‌ధ్య వాగ్వాదం జ‌రిగిన‌ట్లుగా చెబుతున్నారు. మాటా.. మాటా పెరిగి చివ‌ర‌కు స‌ద‌రు మ‌హిళ కాల‌ర్‌ ను య‌శ్ వ‌దాలి ప‌ట్టుకున్న‌ట్లుగా చెబుతున్నారు. అంద‌రి ముందు ఆమె కాల‌ర్‌ను ప‌ట్టుకోవ‌టంతో పాటు.. ఆమెను తీవ్రంగా తిట్టేసిన‌ట్లుగా స‌మాచారం. దీంతో.. ఆమె త‌న‌పై లైంగిక దాడి జ‌రిగిందంటూ పోలీస్ స్టేష‌న్ లో ఫిర్యాదు చేశారు.

స‌ద‌రు మ‌హిళ ఇచ్చిన ఫిర్యాదును తీసుకున్న పోలీసులు సెక్ష‌న్ 354.. 504ల కింద కేసు న‌మోదు చేశారు. అనంత‌రం అత‌డ్ని అదుపులోకి తీసుకున్నారు. ఈ ఉదంతం ఇప్పుడు బాలీవుడ్ వ‌ర్గాల్లో చ‌ర్చ‌గా మారింది.