తాప్సీకి ఫిల్టర్ కావాలన్న చెల్లి

ఆ మధ్య ఓ స్టేజి మీద తన మొదటి సినిమా ఝుమ్మంది నాదం షూటింగ్ అనుభవం గురించి చెబుతూ సౌత్ లో పాటల చిత్రీకరణ గురించి కాస్తంత ఎగతాళిగా మాట్లాడి విమర్శల పాలైన హీరోయిన్ తాప్సీ పన్ను చివరికి దర్శకేంద్రుడికి సారీ చెప్పే దాకా నెటిజెన్లు వదల్లేదు. అదలా ఉంచితే ఇలా వివాదాల్లో నలగడం తాప్సీకి కొత్తేమి కాదు. ఇదే విషయం చెల్లి షగున్ పన్ను నొక్కి చెబుతోంది. ఆ మాట స్వయంగా తాప్సీ నే షేర్ చేసుకుంటోంది. తనకు నోటి అదుపు ఉండాలని చెల్లి షగున్ చాలాసార్లు చెబుతూ ఉంటుందని ఫిల్టర్ పెట్టుకోమని సలహా ఇస్తుంటుందని చెబుతోంది. ఒకవేళ తన మాటల వల్ల ఎవరైనా హర్ట్ అయితే క్షమాపణ చెప్పడానికి కూడా వెనుకాడనని ఒప్పుకుంటున్న తాప్సీ యావరేజ్ గా ఉండటమే తన ప్లస్ పాయింటట. గొప్ప అందం తనకు లేకపోవడం వల్లే పెర్ఫార్మన్స్ కు అవకాశం దక్కుతోంది అని చెప్పిన తాప్సీ ఈ మధ్య మళ్ళి స్పీడ్ పెంచింది.

ఈ నెల ఆది పినిశెట్టి సరసన నటించిన నీవెవరో విడుదలకు సిద్ధంగా ఉండగా థ్రిల్లర్ జానర్ కావడంతో అమ్మడికి దీని మీద గట్టి ఆశలే ఉన్నాయి. దీని తర్వాత హిందీలో సెప్టెంబర్ 14న అనురాగ్ కశ్యప్ దర్శకత్వం వహించిన మన్మరాజీయా రిలీజ్ కాబోతోంది. దీంతో పాటు ప్రకాష్ రాజ్ హిందీ లో తీస్తున్న ఉలవచారు బిర్యానీ రీమేక్ తడ్కా షూటింగ్ ప్రస్తుతం హోల్డ్ లో ఉంది. పింక్ తర్వాత అమితాబ్ బచ్చన్ తో కలిసి నటిస్తున్న బద్లా వచ్చే ఏడాది విడుదల కానుంది. ఆ మధ్య చేసిన సుర్మా అంత ఫలితాన్ని ఇవ్వనప్పటికీ తాప్సీ తన ఫ్యూచర్ మీద నిశ్సితంగా ఉంది. తన చెల్లి షగున్ ని కూడా తెరకు పరిచయం చేసే ప్రయత్నాలు ముమ్మరం చేసింది. త్వరలో ఓ క్రేజీ ప్రాజెక్ట్ తో చెల్లి తెరంగేట్రం చేయించేందుకు బ్యాక్ గ్రౌండ్ సిద్ధం చేసినట్టు సమాచారం.