పెయింటర్ గా మారిపోయిన సూపర్ స్టార్ తనయ..!

సూపర్ స్టార్ మహేష్ బాబు - నమ్రత శిరోద్కర్ దంపతుల ముద్దుల తనయ సితార ఘట్టమనేని గురించి ప్రత్యేక పరిచయాలు అవసరం లేదు. సోషల్ మీడియాలో యాక్టీవ్ గా ఉండే ప్రతి ఒక్కరికీ ఈ స్టార్ కిడ్ చేసే అల్లరి గురించి.. ఆమె టాలెంట్ గురించి తెలుసు. తొమ్మిదేళ్ల ప్రాయంలోనే దర్శకుడు వంశీ పైడిపల్లి కుమార్తె ఆద్య‌తో క‌లిసి యూట్యూబ్ ఛానల్ నిర్వహిస్తూ.. సోషల్ మీడియాలో విపరీతమైన క్రేజ్ సంపాదించుకుంది.

'A & S' (ఆద్య - సితార) అనే పేరుతో ఉన్న ఈ యూట్యూబ్ ఛానల్ లో ఫన్నీ ఛాలెంజెస్ - గేమ్స్ తో పాటుగా ట్రావెలింగ్ స్టోరీలను పంచుకుంటూ ఉంటారు. తన తండ్రితో కలిసి షూటింగులకు విదేశాలకు వెళ్ళినప్పుడు.. అక్కడ గడిపిన ఆహ్లాదకరమైన క్షణాలను కెమెరాలో బంధించి.. వాటిని సోషల్ మీడియాలో షేర్ చేస్తూ ఉంటుంది సితార. ఈ క్రమంలో తాజాగా విండో పెయింటింగ్ ట్యుటోరియల్‌ వీడియోని తన ఛానల్ లో పోస్ట్ చేసింది.

గతంలో ఓ వీడియోలో స్కై పెయింటింగ్ ట్యుటోరియల్‌ గురించి వివరించిన సితార పాప.. ఇప్పుడు లేటెస్టుగా విండో పెయింటింగ్ ఎలా వేయాలో తెలియజేసింది. పెయింటింగ్ చేయడానికి ఏమేమి కావాలి? ఎలా వేయాలి? అనే విషయాలను సూపర్ స్టార్ డాటర్ తన ముద్దుముద్దు మాటలతో క్యూట్ ఎక్స్ ప్రెషన్స్ తో వివరించడం అందరినీ ఆకట్టుకుంటుంది. ఇంగ్లీష్ లో అనర్గళంగా మాట్లాడుతూ ఆశ్చర్యపరిచింది.

పెయింటింగ్ చేయడమే కాదు.. సితారలో సింగింగ్ మరియు డ్యాన్సింగ్ టాలెంట్స్ కూడా ఉన్నాయనే సంగతి తెలిసిందే. గతంలో ఆమె తల్లి నమ్రత సోషల్ మీడియాలో షేర్ చేసిన అల్లరి వీడియోలు వైరల్ అయ్యాయి. మహేష్ సైతం తన గారాల కూతురిని అన్ని విషయాల్లోనూ ఎంకరేజ్ చేస్తూ ఉంటారు. షూటింగ్ లతో ఎంత బిజీగా ఉన్న ఆమెతో వీలైనంత ఎక్కువ సమయం స్పెండ్ చేస్తూ ఉంటారనే విషయం తెలిసిందే.

ఇకపోతే సితార వీడియోలు చూసి సూపర్ స్టార్ ఫ్యాన్స్.. ఘట్టమనేని ఫ్యామిలీ మూడోతరం వారసురాలు తెరంగేట్రం చేస్తే చూడాలని ఆశ పడుతున్నారు. గతంలో ఓ హాలీవుడ్ సినిమాకి డబ్బింగ్ చెప్పిన సితార.. సిల్వర్ స్క్రీన్ మీద ఎంట్రీ ఇవ్వాలని కోరుకుంటున్నారు. ఇప్పటికే మహేష్ తనయుడు గౌతమ్ కృష్ణ '1 నేనొక్కడినే' సినిమాలో నటించి ఆకట్టుకున్నాడు. ఈ క్రమంలో త్వరలోనే లిటిల్ ప్రిన్సెస్ సితార అరంగేట్రం కూడా ఉంటుందేమో చూడాలి.