'గోవా డైరీస్' తో వచ్చిన సితార పాప..!

సూపర్ స్టార్ మహేష్ బాబు - నమ్రత శిరోద్కర్ దంపతుల ముద్దుల కూతురు లిటిల్ ప్రిన్సెస్ సితార ఘట్టమనేని అందరికీ సుప‌రిచితమే. తన క్యూట్ నెస్ తో ముద్దుముద్దు మాటలతో ఆకట్టుకునే సితార పాపకి తొమ్మిదేళ్ల ప్రాయంలోనే సోషల్ మీడియాలో మంచి క్రేజ్ ఉంది. ఈ చిన్నారి చేసే అల్లరి వీడియోలు - సింగింగ్ అండ్ డ్యాన్సింగ్ వీడియోలు నెట్టింట సందడి చేస్తూ ఉంటాయి. చిన్న వయసులోనే సూపర్ పాపులారిటీ తెచ్చుకున్న ఈ స్టార్ కిడ్.. స్వయంగా ఓ యూట్యూబ్ ఛానల్ కూడా నిర్వహిస్తోంది.

దర్శకుడు వంశీ పైడిపల్లి కుమార్తె ఆద్య‌తో క‌లిసి ఇద్దరి పేర్లు వచ్చేలా 'A & S' అని ఈ యూట్యూబ్ ఛానల్ నడుపుతున్నారు. ఇందులో పిల్లలను ఎంటర్టైన్ చేసే ఫన్నీ వీడియోలు.. ఛాలెంజెస్ - టాస్క్ లు - గేమ్స్ వంటివి అప్లోడ్ చేస్తూ ఉంటారు. ఈ ఛానల్ కు ప్రస్తుతం రెండున్నర లక్షలకు పైగా సబ్స్క్రైబర్స్ ఉండటం విశేషం. తాజాగా ట్రావెల్ టేల్స్ పేరుతో గోవా టూర్ కు సంబంధించిన విషయాలని వెల్లడిస్తూ ఈ చిచ్చర పిడుగులు ఓ వీడియో షేర్ చేశారు.

'సర్కారు వారి పాట' షూటింగ్ కోసం ఇటీవల మహేష్ బాబు గోవా వెళ్లిన సంగతి తెలిసిందే. పనిలో పనిగా మహేష్ తన ఫ్యామిలీని కూడా తీసుకెళ్లారు. వీరితో పాటుగా సన్నిహితంగా ఉండే వంశీ పైడిపల్లి ఫ్యామిలీ కూడా వెళ్లారు. ఈ సందర్భంగా అక్కడ గడిపిన సరదా క్షణాలను సితార ఘట్టమనేని - ఆధ్యా పైడిపల్లి ఇద్దరూ 'గోవా డైరీస్' రూపంలో తీసుకొచ్చారు. రెస్టారెంట్ కి వెళ్లి బ్రెడ్ తీసుకొచ్చి బాతులకు పెట్టడం దగ్గర నుంచి.. బీచ్ కు వెళ్లి ఎంజాయ్ చేసే వరకు ఈ వీడియోలో చెప్పే ప్రయత్నం చేశారు. ఇద్దరు పిల్లల ప్యూర్ అండ్ ఇన్నోసెంట్ మాటలు అందరిని ఆకట్టుకుంటున్నాయి.

మహేష్ బాబు ట్విట్టర్ లో ఈ వీడియోని షేర్ చేస్తూ.. ''ఇదంతా ఎలా మొదలైంది! నాకు ఇష్టమైన జంట తిరిగి వచ్చింది.. ఈసారి మమ్మల్ని గోవా కు తీసుకెళ్లారు! ఎప్పటిలాగే ఈ వీడియో నచ్చింది! రాక్ మై గర్ల్స్'' అని ట్వీట్ చేశారు. ప్రస్తుతం ఆధ్య & సితార వీడియో సోషల్ మీడియాలో వైరల్ అవుతోంది.