తెలుగు మార్కెట్ పై శివ కన్ను!

కోలీవుడ్ లో హీరో శివ కార్తికేయన్ కు మంచి ఇమేజ్ తో భారీ మార్కెట్ కూడా ఉంది. వైవిధ్యమైన కథలతో ప్రయోగాలు చేస్తూనే మరోపక్క కమర్షియల్ సినిమాలతో తన అభిమానులను అలరిస్తూ ఉంటాడు. అక్కడ ఎంత సక్సెస్ అయినా తెలుగులో కూడా రుజువు చేసుకుంటే ఆ కిక్కే వేరనే సంగతి శివ కార్తికేయన్ కు తెలియంది కాదు. రజనీకాంత్-కమల్ హాసన్-విక్రమ్-సూర్య-కార్తీ లాంటి హీరోలు ఇక్కడ సమాంతరంగా మార్కెట్ ని ఎంజాయ్ చేయటం చూసుంటాడుగా. అందుకే తెలుగులో ఒక స్ట్రెయిట్ సినిమా చేయటం మీద చాలా ఉత్సాహంగా ఉన్నాడు. ఈ మాట తనే స్వయంగా అంటున్నాడు. అతని కొత్త సినిమా సీమ రాజా టీజర్ ఇటీవలే విడుదల చేసారు. సమంతా హీరోయిన్ గా నటించిన ఆ మూవీలో మహానటి కీర్తి సురేష్ ఒక స్పెషల్ సాంగ్ లో తళుక్కుమంది. దీని మీద తమిళనాట భారీ అంచనాలు ఉన్నాయి. పల్లెటూరి నేపధ్యంలో రూపొందిన ఈ సినిమాను త్వరలో విడుదల చేయనున్నారు.

శివ కార్తికేయన్ ఇప్పటి దాకా 13 సినిమాల దాకా చేసాడు. అందులో మంచి హిట్స్ కూడా ఉన్నాయి. కానీ తెలుగులో డబ్ అయ్యింది మాత్రం రెమో ఒక్కటే. అందులో కూడా కీర్తి సురేషే హీరోయిన్. ఆడవేషం వేసుకున్న హీరో పాత్ర కావడంతో పాటు తమిళ నేటివిటీ సమస్య వల్ల ఆ సినిమా మనవాళ్లకు అంతగా ఎక్కలేదు. దిల్ రాజు విడుదల చేసినా జస్ట్ యావరేజ్ అనిపించుకుంది. అది మినహాయిస్తే ఇంకే సినిమా తనది రాలేదు. అందుకే రెగ్యులర్ గా సినిమాలు చూసే తెలుగు ప్రేక్షకులకు కూడా శివ కార్తికేయన్ కొత్త మొహమే. ఆ లోటు పూడ్చుకునే ఉద్దేశంతోనే శివ కార్తికేయన్ తెలుగు లో స్ట్రెయిట్ మూవీ చేయాలనే ఉత్సాహంతో ఉన్నాడు. ఎవరితో ఎప్పుడు ఉంటుంది అనే వివరాలు బయట పెట్టలేదు కానీ కార్తీ తరహాలో ఊపిరి లాంటి సినిమాతో వస్తాడా లేక సోలో హీరోగా ట్రై చేస్తాడా వేచి చూడాలి. సీమ రాజా తెలుగులో డబ్ చేసే అవకాశాలు ఉన్నాయి.