భారీ యాక్షన్ థ్రిల్లర్ తో బరిలోకి సిక్స్ ప్యాక్ హీరో!

సూపర్ స్టార్ కృష్ణగారి ఫ్యామిలీ నుంచి మహేశ్ బాబు తరువాత హీరోగా సుధీర్ బాబు పరిచయమయ్యాడు. బలమైన సినిమా నేపథ్యం ఉన్న కారణంగా వచ్చాడని చాలామంది లైట్ తీసుకున్నారు. అయితే ఆయన అవకాశం ఉంది గనుక రాలేదనే విషయం కొంతకాలానికే వాళ్లకి అర్థమైంది. నటుడిగా తనని తాను ఆయన మలచుకుంటున్న విధానం .. నిదానమే ప్రధానమన్నట్టుగా తనకి నచ్చిన పాత్రలను మాత్రమే చేస్తూ వెళుతుండటం అందరూ గమనించారు. ఇక కృష్ణ .. మహేశ్ బాబు పేర్లను హైలైట్ చేస్తూ తన కెరియర్ పరంగా వాడుకునే ప్రయత్నాలు ఆయన చేయలేదు.

మంచి ఫిజిక్ ను మెయింటెయిన్ చేస్తూ .. తన బాడీ లాంగ్వేజ్ కి తగిన పాత్రలను చేస్తూ ఆయన తన గ్రాఫ్ ను పెంచుకుంటూ వెళుతున్నాడు. ఇక తన సినిమాలు హిట్ అయినా .. ఫ్లాప్ అయినా ఆయన సమానంగానే తీసుకుంటాడుగానీ హడావిడి చేయడు. ఇక తన సినిమాలకి సంబంధించిన వేడుకలలో ఎవరి క్రెడిట్ వాళ్లకి ఇచ్చే ఆయన తీరు అందరికీ నచ్చింది. ఇక ఆయన వ్యక్తిత్వం కూడా ఆయనకంటూ కొంతమంది దర్శక నిర్మాతలను తయారు చేస్తోంది. అలా ఆయన ఇప్పుడు ఇంద్రగంటి మోహనకృష్ణ దర్శకత్వంలో మూడో సినిమాగా 'ఆ అమ్మాయి గురించి మీకు చెప్పాలి' చేశాడు.

బెంచ్ మార్క్ స్టూడియోస్ - మైత్రీ మూవీ మేకర్స్ వారు సంయుక్తంగా నిర్మించిన ఈ సినిమాకి వివేక్ సాగర్ సంగీతాన్ని సమకూర్చాడు. ఈ సినిమా విడుదలకి సిద్ధమవుతుండగానే సుధీర్ బాబు మరో భారీ సినిమాను లైన్లో పెట్టేశారు. హీరోగా 10 ఏళ్ల కెరియర్ ను ఇటీవలే పూర్తిచేసిన సుధీర్ బాబు, ఒక భారీ యాక్షన్ థ్రిల్లర్ చేయాలనుంది అని చెప్పాడు. అన్నట్టుగానే ఆయన ఆ జోనర్లో సినిమా చేయడానికి రెడీ అవుతున్నాడు. భవ్య క్రియేషన్స్ ఆనంద్ ప్రసాద్ ఈ సినిమాకి నిర్మాతగా వ్యవహరిస్తున్నాడు.

తాజాగా ఈ సినిమా నుంచి ఫస్టు పోస్టర్ ను రిలీజ్ చేశారు. వరుసగా ఉంచిన మెషిన్ గన్స్ ఈ పోస్టర్ లో కనిపిస్తున్నాయి. 'గన్స్ అబద్ధాలాడవు' అంటూ ఈ సినిమాపై ఆసక్తిని రేకెత్తించే ప్రయత్నం చేశారు. కెరియర్ పరంగా సుధీర్ బాబుకి ఇది 16వ సినిమా. మహేశ్ సూరపనేని ఈ సినిమాకి దర్శకత్వం వహిస్తున్నాడు. గతంలో 'కథలో రాజకుమారి' అనే ఒక విభిన్నమైన కథా చిత్రాన్ని ప్రేక్షకుల ముందుకు తీసుకొచ్చిన ఆయన, ఈ సారి యాక్షన్ థ్రిల్లర్ తో రంగంలోకి దిగుతున్నాడు. ఈ సినిమాలో శ్రీకాంత్ ... భరత్ కీలకమైన పాత్రలలో కనిపించనున్నారు.

శ్రీకాంత్ ఈ మధ్యకాలంలో కీలకమైన పాత్రలను .. విలన్ రోల్స్ ను ను చేస్తూ ముందుకు వెళుతున్నాడు. విభిన్నమైన .. విలక్షణమైన పాత్రలకు గ్రీన్ సిగ్నల్ ఇస్తూ బిజీ అవుతున్నాడు. అలాగే ఈ సినిమాలోను ఆయన ఒక డిఫరెంట్ రోల్ చేస్తున్నాడు. 'ప్రేమిస్తే' ఫేమ్ భరత్ కూడా ఈ సినిమాలో కనిపించనున్నాడు. ఆయన పాత్రను ఎలా డిజైన్ చేశారనేది చూడాలి. ఈ సినిమాలో కథానాయికలు ఎవరనేది త్వరలోనే ప్రకటించనున్నారు. మొత్తానికి సుధీర్ బాబు పెద్ద బ్యానర్లో .. భారీ యాక్షన్ థ్రిల్లర్ తో ఈ ఏడాదిలోనే మరోసారి ప్రేక్షకులను పలకరించనున్నాడన్న మాట.