సినిమా ఈవెంట్‌ లో సిక్సర్ల మోత

ఈమద్య కాలంలో సినిమాను ఎంత బాగా తెరకెక్కించిన దాన్ని ప్రేక్షకులకు రీచ్‌ అవ్వడానికి అంతకు మించి క్రియేటివ్‌ గా ఆలోచించి పబ్లిసిటీ చేయాల్సి ఉంటుంది. ప్రమోషన్‌ కార్యక్రమాలు బాగా చేస్తేనే సినిమా ప్రేక్షకుల్లోకి వెళ్తుందనే విషయం ప్రత్యేకంగా చెప్పనక్కర్లేదు. అందుకే గతంతో పోల్చితే ఇప్పుడు సినిమా ప్రమోషన్‌ కార్యక్రమాల్లో కొత్తదనం కనిపిస్తుంది. సినిమా గురించి నలుగురిలో చర్చ జరగాలనే ఉద్దేశ్యంతో కొత్త కొత్తగా ప్రయత్నిస్తున్నారు.

తాజాగా నాని హీరోగా నటించిన 'జెర్సీ' చిత్రం ప్రీ రిలీజ్‌ వేడుక జరిగింది. ఆ వేడుకలో క్రికెట్‌ ఆడించారు. క్రికెట్‌ నేపథ్యంలో మూవీ అవ్వడం వల్ల ప్రీ రిలీజ్‌ వేడుక మొత్తం క్రికెట్‌ నేపథ్యంలో సాగింది. యాంకర్‌ సుమ క్రికెటర్‌ గా వచ్చింది. ఇక వచ్చిన అతిథులు మరియు చిత్ర యూనిట్‌ సభ్యులు కూడా క్రికెట్‌ ఆడారు. ఈ కార్యక్రమంకు ముఖ్య అతిథిగా వచ్చిన వెంకటేష్‌, నానితో కలిసి క్రికెట్‌ ఆడాడు. టాస్‌ లో నెగ్గిన వెంకటేష్‌ బ్యాటింగ్‌ చేసేందుకు ఆసక్తి చూపించాడు. వెంకీ బ్యాటింగ్‌ చేయగా నాని బౌలింగ్‌ చేశాడు.

సహజంగా క్రికెట్‌ అభిమాని మరియు క్రీడాకారుడు అయిన వెంకటేష్‌, నాని వేసిన బాల్స్‌ ను జనాల్లో పడేలా కొట్టాడు. వరుసగా సిక్సర్లు కొట్టాడు. ఆ తర్వాత నానిని బ్యాటింగ్‌ చేయమని చెప్పగా, నేను ఏప్రిల్‌ 19వ తారీకున బ్యాటింగ్‌ చేస్తానంటూ నవ్వుకుంటూ బ్యాట్‌ ను పట్టుకోలేదు. వీరిద్దరు మాత్రమే కాకుండా సుధీర్‌ వర్మ మరియు మోహన కృష్ణ ఇంద్రగంటి కూడా క్రికెట్‌ ఆడారు. సుధీర్‌ వర్మ బౌలింగ్‌ వేయగా ఇంద్రగంటి కూడా సిక్స్‌ ల మీద సిక్స్‌ లు కొట్టాడు. మొత్తానికి జెర్సీ చిత్రం ప్రీ రిలీజ్‌ ఈవెంట్‌ వారు అనుకున్నట్లుగానే టాక్‌ ఆఫ్‌ ది ఇండస్ట్రీ అయ్యింది.