అడ‌విలో మా నాన్న భారీగా నిధి దాచాడుః వీర‌ప్ప‌న్ కూతురు

గంధ‌పు చెక్క‌ల స్మ‌గ్ల‌ర్ వీర‌ప్ప‌న్ కూతురు విజ‌య‌ల‌క్ష్మి ఓ సినిమాలో న‌టిస్తోంది. ఆమె ప్ర‌ధాన పాత్ర‌లో తెర‌కెక్కుతున్న చిత్రం ‘మా వీరన్ పిళ్లై’. కేఎన్ఆర్ మూవీస్ బ్యాన‌ర్ పై కేఎన్ఆర్ రాజా స్వ‌యంగా నిర్మిస్తూ ద‌ర్శ‌క‌త్వం వ‌హిస్తున్నారు. అయితే.. ఈ సినిమా వీర‌ప్ప‌న్ జీవితం ఆధారంగా రూపొందుతోంద‌నే ప్ర‌చారం ఉంది.

ఇప్ప‌టికే నిర్మాణం పూర్తిచేసుకున్న ఈ సినిమా పోస్ట్ ప్రొడ‌క్ష‌న్ వ‌ర్క్ లో ఉంది. త్వ‌ర‌లోనే విడుద‌ల చేసేందుకు సిద్ధ‌మ‌వుతున్నారు మేక‌ర్స్‌. తాజాగా.. సినిమా విశేషాల‌ను వెల్ల‌డించింది చిత్ర‌బృందం. ఈ సంద‌ర్భంగా.. వీర‌ప్ప‌న్ కూతురు విజ‌య‌ల‌క్ష్మి మాట్లాడుతూ ప్ర‌చారంలో ఉన్న‌ట్టుగా వీర‌ప్ప‌న్ కు, ఈ సినిమాకు ఎలాంటి సంబంధమూ లేద‌ని ప్ర‌క‌టించారు.

స‌మాజంలోని స‌మ‌స్య‌ల‌నే ఇతివృత్తంగా తీసుకొని సినిమాను తెర‌కెక్కించిన‌ట్టు తెలిపారు. ఢిల్లీలో సాగుతున్న రైతుల పోరాటంతోపాటు, మోస‌పోతున్న యువ‌తుల క‌ష్టాల‌ను కూడా చూపించ‌బోతున్న‌ట్టు చెప్పారు. కాగా.. త‌న‌తండ్రి గురించి మీడియా అడిగిన ప‌లు ప్ర‌శ్న‌ల‌కు ఆమె స‌మాధానం చెప్పారు.

వీర‌ప్ప‌న్ స‌త్య‌మంగ‌ళం అడ‌వుల్లోనే ఎక్కువ కాలం జీవించార‌ని చెప్పారు విజ‌య‌ల‌క్ష్మి. అయితే.. ఆ అడ‌వుల్లో త‌న ‌తండ్రి అతిపెద్ద నిధిని దాచి పెట్టార‌ని తెలిపారు. కానీ.. అది ఎక్క‌డ ఉందో తెలియ‌ద‌ని అన్నారు. ఆ నిధి గురించి తెలిసిన వారు ఇద్ద‌రేన‌ని చెప్పారు. ఒక‌రు త‌న తండ్రికాగా.. మ‌రొక‌రు ఆయ‌న అనుచ‌రుడ‌ని తెలిపారు. కానీ.. వీరిద్ద‌రూ ఈ లోకంలో లేర‌ని, అందువ‌ల్ల ఆ నిధి ఎక్క‌డ ఉందో ఎవ్వ‌రికీ తెలిసే ఛాన్స్ లేద‌ని అన్నారు.