తెలుగు సినిమా మారిందన్న తెలుగమ్మాయి

తెలుగమ్మాయిలకు తెలుగులో అవకాశాలు రాకపోతే కోలీవుడ్ వైపు చూడటం మామూలే. కానీ శోభిత ధూళిపాళ్ల మాత్రం ఆశ్చర్యకరంగా బాలీవుడ్ వైపు చూసింది. ఐతే తెలుగులో అవకాశాలు రాక ఆమె బాలీవుడ్ వైపు వెళ్లలేదు. అందాల పోటీల్లో సత్తా చాటుకున్న ఆమెకు బాలీవుడ్డోళ్లే పిలిచి అవకాశాలిచ్చారు. అక్కడ మంచి మంచి పాత్రలతో సత్తా చాటుకున్న శోభిత కొంచెం లేటుగా టాలీవుడ్ వైపు చూసింది. అడివి శేష్ హీరోగా తెరకెక్కిన ‘గూఢచారి’లో శోభిత కథానాయిక పాత్ర పోషించింది. టాలీవుడ్ కు ఇలాంటి సినిమాతో పరిచయం కాబోతుండటం తన అదృష్టమంటున్న శోభిత.. గత కొన్నేళ్లలో తెలుగు సినిమా చాలా మారిందంటూ కితాబిచ్చింది.

ముఖ్యంగా గత రెండేళ్లుగా తెలుగులో వస్తున్న సినిమాలు తనను చాలా ఆశ్చర్యానికి గురి చేశాయని శోభిత చెప్పింది. ‘క్షణం’.. ‘పెళ్లిచూపులు’ లాంటి సినిమాల్ని ఆమె ఉదాహరణగా చెప్పింది. ఇలాంటి సినిమాలు టాలీవుడ్ ను చాలా ముందుకు తీసుకెళ్తాయని ఆమె అంది. తాను ‘క్షణం’ సినిమా చూసిన కొన్ని రోజులకే అడివి శేష్ ‘గూఢచారి’ సినిమా గురించి చెప్పాడని.. తన పాత్ర చాలా నచ్చడంతో ఈ సినిమా చేశానని ఆమె చెప్పింది. అడివి శేష్ మామూలోడు కాదని.. కేవలం నటనకు పరిమితం కాకుండా ఈ సినిమాకు సంబంధించిన ప్రతి విభాగంలోనూ అతను భాగస్వామి అయ్యాడని శోభిత చెప్పింది. రైటర్ గా తనతో పాటు అన్ని పాత్రల్నీ అతను చాలా బాగా తీర్చిదిద్దాడని ఆమె కితాబిచ్చింది. దర్శకుడు శశికిరణ్ పర్ఫెక్షనిస్ట్ అని.. చిన్న ఎక్స్ ప్రెషన్ విషయంలో కూడా రాజీ పడలేదని చెప్పింది శోభిత. ‘గూఢచారి’ కచ్చితంగా పెద్ద హిట్టయి తనకు మంచి పేరు తెస్తుందని శోభిత ధీమా వ్యక్తం చేసింది.