స‌ల్మాన్ జైలుకెళ్ల‌టం ఆమెకు ఫుల్ హ్యాపీన‌ట‌!

స‌ల్మాన్ పై సంచ‌ల‌న వ్యాఖ్య‌లు చేసిందో బాలీవుడ్ న‌టి. కృష్ణ‌జింక‌ల్ని వేటాడిన కేసులో దోషిగా కోర్టు తీర్పు ఇచ్చి.. ఐదేళ్లు జైలుశిక్ష విధించిన స‌ల్మాన్ త్వ‌ర‌గా తిరిగి రావాలంటూ బాలీవుడ్ ప్ర‌ముఖులంతా కోరుకుంటున్న వేళ‌.. వారికి భిన్నంగా భారీ పోస్టు పెట్టింది బ్రిటీష్ సింగ‌ర్ క‌మ్ బాలీవుడ్ న‌టి సోఫియా హ‌య‌త్‌.

జైల్లో ఉన్న స‌ల్మాన్ ను ఓదార్చేందుకు.. ఆయ‌న్ను ప‌లుక‌రించేందుకు జోథ్ పూర్ జైలుకు క్యూ క‌డుతున్న బాలీవుడ్ ప్ర‌ముఖుల‌కు భిన్న‌మైన మాట‌ల‌తో సంచ‌ల‌నంగా మారిందీ సుంద‌రి. స‌ల్మాన్ జైలుకు వెళ్ల‌టం త‌న‌కెంతో సంతోషాన్ని ఇచ్చిన‌ట్లుగా ఆమె తాజాగా పోస్ట్ చేసిన పోస్ట్ లో పేర్కొంది. స‌ల్మాన్ జైలుకు వెళ్ల‌టం అత‌ని క‌ర్మ‌గా తేల్చ‌ట‌మే కాదు.. చేసిన పాపాల‌కు త‌గిన ఫ‌లితాన్ని అనుభ‌విస్తున్నాడంటూ తాను చెప్పాల్సిన విష‌యాన్ని ఓపెన్ గా చెప్పేసింది.

బాలీవుడ్ లో స‌ల్మాన్ పెద్ద స్టార్ అని.. ఇండ‌స్ట్రీ మొత్తం అత‌ని క‌నుసైగ‌లో న‌డుస్తుంద‌ని.. అందుకే అత‌నికి వ్య‌తిరేకంగా మాట్లాడ‌టానికి జంకుతార‌న్న సోఫియా.. త‌న‌కు ఆ భ‌యం లేద‌ని చెప్పింది.

"చేసిన దానికి స‌ల్మాన్ ఫ‌లితం అనువిస్తున్నాడు. స‌ల్మాన్ జైలుకెళ్ల‌టం నాకు సంతోషాన్ని ఇస్తుంది. భార‌త చ‌ట్టాలు ఆల‌స్య‌మైనా న్యాయాన్ని ఇస్తాయి" అంటూ సుదీర్ఘ‌మైన పోస్టులో ఆస‌క్తిక‌ర‌వ్యాఖ్య‌లు చేస్తూ సంచ‌ల‌నంగా మారారు. టీవీ షోల‌తో పాపుల‌ర్ అయి.. దాదాపు అర‌డ‌జ‌ను బాలీవుడ్ సినిమాలు చేసిన సోఫియా.. స‌ల్మాన్‌ కు వ్య‌తిరేకంగా గ‌ళాన్ని విప్ప‌టం ఇప్పుడు అంద‌రి దృష్టిని ఆక‌ర్షిస్తోంది.