నాగ్ తనకు తానే ఇచ్చుకుంటున్నాడు

స్టార్ హీరోల పుట్టిన రోజులంటే ఈ మధ్య ఏదో ఒక హంగామా ఉండి తీరాల్సిందే. ఆ రోజు ఆ హీరో నటిస్తున్న సినిమాకు సంబంధించి ఏదో ఒక విశేషాన్ని బయటపెట్టి అభిమానుల్ని ఆనందంలో ముంచెత్తడం మామూలవుతోంది. మొన్న చిరంజీవి పుట్టిన రోజుకు ఎన్నెన్ని విశేషాలు చూశామో తెలిసిందే. రామ్ చరణ్ తన కొత్త సినిమా టీజర్ తో వచ్చాడు. సాయిధరమ్ తేజ్ తన సినిమా ఆడియో ఫంక్షన్ ప్లాన్ చేశాడు. వరుణ్ తేజ్ తన సినిమా పోస్టర్ రిలీజ్ చేశాడు. ఇలా మెగా హీరోలంతా చిరంజీవికి పుట్టిన రోజు కానుకలు ఇచ్చారు. చిరు పుట్టిన రోజుకు వారం రోజుల తర్వాత ఇప్పుడు మరో స్టార్ హీరో నాగార్జున బర్త్ డే వస్తోంది.

ఆ రోజు అక్కినేని యంగ్ హీరోస్ నాగ్ కు కానుకలు ఇవ్వడానికి సిద్ధంగా ఉన్నారు. నాగ్ చిన్న కొడుకు అఖిల్ హీరోగా తెరకెక్కుతున్న తొలి సినిమాకు సంబంధించి టైటిల్ లోగో ఆవిష్కరణతో పాటు, టీజర్ రిలీజ్ కూడా ఆ రోజే ఉండబోతోంది. మరోవైపు నాగచైతన్య-గౌతమ్ మీనన్ కాంబినేషన్ లో వస్తున్న సినిమా ఫస్ట్ లుక్ టీజర్ కూడా అదే రోజు రిలీజ్ చేయబోతున్నారు. ఈ రెండు కానుకలతో పాటు తనకు తానే ఓ కానుక ఇచ్చుకోబోతున్నాడు నాగార్జున. తన కొత్త సినిమా ‘సోగ్గాడే చిన్నినాయనా’ టీజర్ 29నే విడుదల కాబోతోంది. ఈ సినిమాను నాగార్జునే స్వయంగా నిర్మిస్తున్న సంగతి తెలిసిందే. మొత్తానికి ఆ రోజు అక్కినేని అభిమానులకు మూడు పండగలన్నమాట.