ఎన్నిసార్లు రిపేర్లు చేయిస్తావ్ నాగ్?

అక్కినేని నాగార్జున సొంత నిర్మాణ సంస్థలో ఓ సినిమా మొదలుపెట్టాడంటే చాలా పక్కా ప్లానింగ్ తో ఉంటాడని పేరుంది. ఒక్క ‘భాయ్’ సినిమాను మినహాయిస్తే అన్నపూర్ణ సంస్థలో వచ్చిన నాగార్జున సినిమాలన్నీ మంచి ఆదరణ పొందాయి. సొంత బేనర్ లో సినిమా అంటే స్క్రిప్టు దశలోనే చాలా పక్కాగా రెడీ అయ్యి ఆ తర్వాత షూటింగుకి వెళ్తాడు నాగ్. ఐతే ‘సోగ్గాడే చిన్నినాయనా’ విషయంలో మాత్రం ఎక్కడో తేడా కొడుతున్నట్లుంది. కొత్త దర్శకుడు కళ్యాణ్ కృష్ణకు ఏరి కోరి అవకాశమిచ్చిన నాగ్.. అతడి విషయంలో తప్పటడుగు వేశానేమో అని పదే పదే తరచి చూసుకోవాల్సిన పరిస్థితి తలెత్తుతోంది.

ముందుగా అనుకున్న ప్రకారమైతే ‘సోగ్గాడే చిన్నినాయనా’ ఈపాటికే రిలీజైపోవాల్సింది. ఈ ఏడాది ఆరంభంలో ఆ సినిమా సెట్స్ మీదికి వెళ్లింది. నాలుగైదు నెలల్లో సినిమాను పూర్తి చేసేయాలనుకున్నారు. కానీ ఓ దశలో ఔట్ పుట్ నచ్చక నాగ్ సినిమాను ఆపేశాడు. సాయిమాధవ్ బుర్రాతో పాటు ఒకరిద్దరు రచయితల్ని సంప్రదించి.. స్క్రిప్టుకు రిపేర్లు చేయించాడు. మళ్లీ కొత్తగా షెడ్యూల్ మొదులపెట్టాడు. మైసూర్లో తీసిన సన్నివేశాల్ని రీషూట్ చేయించాడు.

ఈ షెడ్యూల్ మొదలవుతున్నపుడు.. సినిమా పూర్తయ్యేదాకా కొనసాగుతుందని ప్రకటించాడు నాగ్. ఐతే ఇప్పుడు కథ మళ్లీ మొదటికి వచ్చింది. రెండోసారి కూడా ఔట్ పుట్ అనుకున్నట్లు రాకపోవడంతో మళ్లీ రీషూట్ అంటున్నట్లు యూనిట్ నుంచి సమాచారం వస్తోంది. మీడియాకు ఏదో రిలీజ్ గురించి సమాచారం ఇచ్చినట్లు రీషూట్ గురించి ఇన్ఫర్మేషన్ ఇవ్వడం విశేషం. ఈ సమాచారం ప్రకారం.. ముందుగా అనుకున్నట్లు సోగ్గాడే.. ఈ డిసెంబర్లో విడుదల కాదట. కొన్ని సన్నివేశాల రీషూట్ కారణంగా ఆలస్యమవుతుండటంతో వచ్చే ఏడాదికి వాయిదా పడిందట. మరి నాగ్ అనుకున్న ఔట్ పుట్ ఎప్పుడొస్తుందో ఏమో మరి.