ముగ్గురు ముంబై భామల్లో మురిపించేదెవరో!

తెలుగు తెరకి ముంబై నుంచి .. మలయాళం నుంచి ఎక్కువగా కథానాయికలు పరిచయమవుతూ ఉంటారు. అలాగే ఈ ఏడాది ముంబై నుంచి ముగ్గురు కథానాయికలు పరిచయమవుతున్నారు. రాజమౌళి దర్శకత్వం వహిస్తున్న 'ఆర్ ఆర్ ఆర్' సినిమా ద్వారా ఆలియా భట్ తెలుగు తెరకి పరిచయం కానుంది. బాలీవుడ్ కుర్రాళ్లను ఒక ఊపు ఊపేసిన ఆలియా, టాలీవుడ్ పిల్లగాళ్ల గుండెలపై ఫిరంగి గుండులా దిగనుంది. ఈ సినిమా విడుదల కోసం అబ్బాయిలంతా ఎంతో ఉత్సాహంతో ఎదురుచూస్తున్నారు.

ఇక పూరి జగన్నాథ్ దర్శకత్వంలో రూపొందుతున్న 'లైగర్' సినిమా ద్వారా, అనన్య పాండే పరిచయమవుతోంది. వెనకట ఏడు మల్లెలెత్తు సుకుమారి అనేవారు. అలాంటి అమ్మాయి ఎలా ఉంటుందనేది ఈ అమ్మాయిని చూసిన తరువాత అర్థమవుతుంది. కళ్లు పెద్దవి చేసి చూస్తే చాలు కందిపోతుందేమోననేంత నాజూకుగా ఈ పిల్ల కనిపిస్తుంది. ఇప్పటికే బ్యాచిలర్స్ తమ రూముల్లో ఈ పిల్ల ఫోటోలు పెట్టేసుకుని, పూజలు గట్రా చేసేస్తూనే ఉన్నారు. ఫేస్ కి పౌడర్ పట్టించేసి ఆ ఫొటోతో కబుర్లు చెబుతూనే ఉన్నారు.

ఆలియా .. అనన్య పాండే ఒక్కొక్క సినిమానే చేస్తూ ఉంటే, ముంబై నుంచి దిగిపోయిన మరో ముద్దుగుమ్మ 'సయీ మంజ్రేకర్' రెండు సినిమాలను చేస్తుండటం విశేషము. చూడటానికి ఈ పిల్ల పీచుమిఠాయిలా ఉంటుంది. చక్కని కనుముక్కుతీరుతో చూడగానే మనసును చుట్టేసుకునే మల్లెతీగలా అనిపిస్తుంది. ఈ సొగసరి 'మేజర్' సినిమాతో తెలుగు తెరకి పరిచయమవుతోంది. ఆ తరువాత వరుణ్ తేజ్ జోడీగా చేస్తున్న 'గని' కూడా విడుదల కానుంది. తెలుగు తెరపై ఎగరడానికి రెడీ అవుతున్న ఈ తేనె పిట్టల్లో ఎవరు ఊరిస్తారో .. ఎక్కువకాలం ఏలేస్తారో చూడాలి.