కొడుకు కొట్టలేకున్నా తండ్రి గట్టిగా కొట్టేలా ఉన్నాడే!

మంచు ఫ్యామిలీ హీరోలకు ఈమద్య కాలంలో కాస్త బ్యాడ్‌ టైమ్‌ నడుస్తున్నట్లుగా అనిపిస్తుంది. మంచు ఫ్యామిలీ అభిమానులు తమ హీరోల సినిమాల విషయంలో నిరుత్సాహంతో ఉన్నారు. వారి చూపు మొత్తం ఇప్పుడు మోహన్‌ బాబు నటిస్తున్న 'సన్నాఫ్‌ ఇండియా' సినిమా పై ఉంది. ఎన్నో అద్బుతమైన పాత్రలను పోషించి సినిమా ఇండస్ట్రీలో అరుదైన రికార్డును నెలకొల్పిన మోహన్‌ బాబు సన్నాఫ్‌ ఇండియా సినిమాలో విభిన్నమైన లుక్‌ తో మెప్పించాడు. ఇప్పటికే విడుదల అయిన పోస్టర్‌ కు తోడు తాజాగా ఉగాది సందర్బంగా ఒక ఫొటోను యూనిట్‌ సభ్యులు షేర్‌ చేశారు.

మోహన్‌ బాబు ఈ లుక్‌ తో కూడా వావ్‌ అనిపించేలా ఉన్నాడు అంటూ అభిమానులు కామెంట్‌ చేస్తున్నారు. మోహన్‌ బాబు వయసు మీద పడుతున్నా కూడా ఆయనలో గ్రేస్ మరియు స్టైల్‌ తగ్గలేదు అంటూ ఈ ఫొటో చూసిన వారు అంటున్నారు. మోహన్‌ బాబు తనయుడు విష్ణు ఇటీవల మోసగాళ్లు సినిమాతో ప్రేక్షకుల ముందుకు వచ్చిన విషయం తెల్సిందే. ఆ సినిమా 50 కోట్లకు పైగా ఖర్చు చేస్తే కనీసం రెండు కోట్ల వసూళ్లు కూడా రాలేదు. మంచు విష్ణు గత చిత్రాలు కూడా నిరాశను మిగిల్చాయి. కాని సన్నాఫ్‌ ఇండియా మాత్రం ప్రేక్షకులను ఏమాత్రం నిరాశ పర్చకుండా ఉంటుందని అభిమానులు నమ్మకంగా ఉన్నారు.

మంచు మనోజ్‌ మరియు మంచు విష్ణుల కెరీర్‌ లు ఆశాజనకంగా లేదు. కనుక ఆయన తండ్రి మోహన్‌ బాబు అయినా సన్నాఫ్‌ ఇండియా సినిమాతో రెచ్చి పోయి సినిమా సక్సెస్‌ ను చేస్తే తప్పకుండా ఆయన కు జనాలు నిరాజనాలు పట్టడం ఖాయం. కొడుకులు సాధించలేని విజయాన్ని మోహన్‌ బాబు సాధించాడనే టాక్‌ ప్రముఖంగా వస్తుంది అనడంలో సందేహం లేదు. సన్నాఫ్‌ ఇండియా సినిమాను మంచు విష్ణు తన 24 ఫ్రేమ్స్‌ బ్యానర్‌ లో నిర్మిస్తున్నాడు. షూటింగ్‌ ముగింపు దశకు వచ్చిన ఈ సినిమా త్వరలో ప్రేక్షకుల ముందుకు రాబోతుంది.