ఇంటర్యూ: ముంబయ్‌ గాళ్స్‌.. ఎంజాయ్‌ చేశాం

లెజెండ్‌ కావాల్సినంత మైలేజ్‌ ఇచ్చింది సోనాల్‌కి. అంతకంటే ముందే రెయిన్‌బో వంటి ఫ్లాప్‌ సినిమాలో నటించిన ఫలితం కెరీర్‌పై తీవ్రంగా పడింది. దానివల్ల చాలా గ్యాప్‌ కూడా వచ్చింది. బాలయ్య పుణ్యమా అని కెరీర్‌కి చక్కని పుషప్‌ దొరికింది. ప్రస్తుతం ఈ భామ రామ్‌ సరసన పండగ చేస్కో సినిమాలో నటించింది. మాస్‌ మసాలా ఫార్ములాటిక్‌ సినిమా త్వరలోనే రిలీజ్‌కి రెడీ అవుతోంది. ఈ సందర్భంగా సోనాల్‌ కొన్ని ఆసక్తికర సంగతుల్ని చెప్పింది.

పండగ ఎలా చేస్కోబోతున్నారు?

పండగ చేస్కో అల్టిమేట్‌ కమర్షియల్‌ సినిమా. రామ్‌లో కొత్త ఎనర్జీని చూస్తారు. అతడిలో స్ప్రింగ్‌ ఏదైనా ఉందా? అనిపించేంత గొప్ప డ్యాన్సర్‌. తనతో స్టెప్పులు మ్యాచ్‌ చేయడానికి డ్యాన్స్‌ మాష్టర్స్‌ సాయం తీసుకున్నా. రకూల్‌ ఓ మంచి నటి. ఇద్దరం ముంబై గాళ్స్‌ కాబట్టి సినిమాలపై చాలా ముచ్చటించుకున్నాం. అలాగే ఇందులో నేను ఓ ఎన్నారై పాత్రలో నటించాను. కాస్త పొగరుగా ఒగరున్న అమ్మాయిని. అందరిపై అధికారం చెలాయించాలని అనుకుంటా. నా పాత్ర చాలా ఎంటర్‌టైన్‌ చేసేదిగా ఉంటుంది.

మధ్యలో కాస్త భయపడ్డారట...

ఈ సినిమా షూటింగులో ఒక భయానక అనుభవం ఎదుర్కొన్నా. అది ఓ మరిచిపోలేని అనుభవం. పోర్చ్‌గల్‌లో అల్గార్‌ అనే అరుదైన స్థలం ఉంది. బీచ్‌, హిల్‌స్టేషన్‌ కలిపి ఉండే అరదమైన ప్లేసు అది. అక్కడ ఓ పాట చిత్రీకరిస్తున్నా. డైరెక్టర్‌ మలినేని గోపిచంద్‌ నన్ను ఓ కొండపై నిలుచోమన్నారు. అయితే అక్కడినుంచి వెనక్కి తిరిగి చూస్తే 150అడుగుల లోయ కనిపించింది. పైగా జివ్వున వేగంగా గాలి వీస్తోంది. అక్కడినుంచి జారి పడిపోయానా.. అదే నా చివరిరోజు అనిపించింది. అంతేనా రామ్‌తో కలిసి అక్కడే స్టెప్పేయాల్సొచ్చింది కూడా. అది ఓ వింతైన అనుభూతినిచ్చింది.

ఫ్యూచర్‌ సినిమాలు...

కళ్యాణ్‌రామ్‌ సరసన షేర్‌ చిత్రంలో నటిస్తున్నా. అలాగే అనుష్క ప్రధానపాత్రలో నటిస్తున్న సైజ్‌ జీరో చిత్రంలోనూ ఓ పాత్రలో నటిస్తున్నా.