నువ్వక్కడ.. నేనిక్కడ.. కలవదిక్కడ

అనిల్ కపూర్ వారసురాలిగా బాలీవుడ్ లో అడుగు పెట్టినా తన టాలెంట్ ప్రూవ్ చేసుకోవడానికి సోనమ్ కపూర్ కు చాలా కాలమే పట్టింది. సొంతగా గుర్తింపు తెచ్చుకోవాలన్న ఆమె కోరిక లాస్ట్ ఇయర్ వచ్చిన ‘నీర్జా’తో నెరవేరింది. ప్రయాణికుల ప్రాణాలు కాపాడటానికి ప్రాణాలొడ్డిన ఎయిర్ హోస్టెస్ నీర్జా బానోత్ జీవిత గాథతో ఈ సినిమా తెరకెక్కించారు. ఆ సినిమా తర్వాత సోనమ్ చాలా రోజులు షూటింగులకు గ్యాప్ ఇచ్చింది.

ఈ ఖాళీ టైంను సోనమ్ ఓ రకంగా బాగానే సద్వినియోగం చేసుకుంది. తన బాయ్ ఫ్రెండ్ - దిల్లీకి చెందిన బిజినెస్ మేన్ ఆనంద్ అహూజాతో సోనమ్ రిలేషన్ షిప్ లో ఉంది. ఈ మధ్యనే ఈ జంట యూఎస్ విహార యాత్రకు కూడా వెళ్లొచ్చింది. నెల రోజులపాటు ఆ దేశమంతా జాలీగా షికార్లు కొట్టొచ్చింది. ప్రస్తుతం ఆనంద్ అహూజా దిల్లీలో ఉండగా సోనమ్ ముంబయిలో ఉంది. ఓ వైపు షూటింగ్ బిజీలో ఉండటంతో రెగ్యులర్ గా టచ్ లో ఉండటం వీలుపడటం లేదట. పోనీ వీడియోకాల్ చేసి లైవ్ లో మాట్లాడుకుందామని అనుకున్నా ఇంటర్నెట్ స్లోగా ఉండటంతో మాట్లాడలేకపోతోందట. హ్యాంగ్ అయిన వీడియో ఛాట్ ను ఫొటో తీసి ఇవీ తన ఇంటర్నెట్ కష్టాలంటూ బుంగమూతి పెట్టుకుని ఫొటో ఇన్ స్టాగ్రామ్ లో షేర్ చేసింది.

సోనమ్ కపూర్ ప్రస్తుతం వీరే ది వెడ్డింగ్ సినిమాలో నటిస్తోంది. ఈ సినిమా మరో ఇద్దరితో కలిసి సోనమ్ సోదరి రియా కపూర్ నిర్మిస్తోంది. కరీనా కపూర్ బిడ్డను కన్నాక తొలిసారి ఈ సినిమానే చేస్తోంది. ఇంతకుముందు సోనమ్ తో ఖూబ్ సూరత్ సినిమా తీసిన శశాంక్ ఘోష్ ఈ సినిమాకు దర్శకుడు. దీంతోపాటు అక్షయ్ కుమార్ హీరోగా నటిస్తున్న ప్యాడ్ మేన్ లోనూ సోనమ్ హీరోయిన్ గా నటిస్తోంది.