బాల‌య్య‌ కోసం గ‌ణేశుడి పాట!

`డిక్టేట‌ర్‌` కోసం ఇటీవ‌లే రంగంలోకి దిగాడు బాల‌య్య‌. రామానాయుడు స్టూడియో లో వేసిన ఓ భారీ సెట్‌ లో చిత్రీక‌ర‌ణ జ‌రుగుతోంది. ఈ షెడ్యూల్ త‌ర్వాత బాల‌య్య ఫారిన్ వెళ్ల‌బోతున్నాడు. యూర‌ప్‌ లోని ప‌లు అరుదైన లొకేష‌న్ల‌ లో సినిమాని తెర‌కెక్కించ‌బోతున్నారు. అక్క‌డ పాట‌ల‌తో పాటు, ఫైట్లు కూడా తీస్తార‌ట‌. పాట‌లు తీయాలంటే ట్యూన్లు కావాలి క‌దా మ‌రి. అందుకే త‌మ‌న్ ట్యూన్స్‌ కోసం కుస్తీ ప‌డుతున్నాడు.

బాల‌య్య సినిమాకి త‌మ‌న్ సంగీతం అందిస్తుండ‌డం ఇదే తొలిసారి. మాస్ హీరో అయిన బాల‌య్య సినిమాకి ప‌నిచేయ‌డం ఆయ‌నొక స‌వాల్‌ గా భావిస్తున్నాడు. `లెజెండ్‌`కి దేవిశ్రీప్ర‌సాద్ ఎలాంటి బాణీలు ఇచ్చాడో అందుకు ధీటైన బాణీల్ని `డిక్టేట‌ర్‌`కి తాను ఇవ్వాల‌ని కంక‌ణం క‌ట్టుకొన్నాడ‌ట త‌మ‌న్‌. ఇటీవ‌లే గ‌ణేశుడి నేప‌థ్యంలో సాగే ఓ పాట‌ని సిద్ధం చేశాడ‌ట‌. `డిక్టేట‌ర్` కోసం గ‌ణేశుడిపై తొలి పాట‌ని చేయ‌డం ఆనందంగా ఉంద‌ని... టీమ్ కూడా చాలా హ్యాపీగా ఫీలైంద‌ని త‌మ‌న్ చెబుతున్నాడు. సినిమాల కోసం గ‌ణేశుడి నేప‌థ్యంలో చాలా పాట‌లు రూపొందుతుంటాయి. జై జై గ‌ణేశా... లాంటి పాట‌లు బాగా పాపుల‌ర్ అయ్యాయి. మ‌రి త‌మ‌న్ ఈసినిమాకోసం ఎలాంటి పాట‌ని ఇచ్చాడో చూడాలి.

ఫారిన్ షెడ్యూల్‌ లోపు మిగిలిన పాట‌ల‌న్నీ కూడా ఇచ్చేయ‌బోతున్నాడ‌ట త‌మ‌న్‌. శ్రీవాస్ ద‌ర్శ‌క‌త్వం వ‌హిస్తున్న `డిక్టేట‌ర్‌`కి కోన వెంక‌ట్‌, గోపీమోహ‌న్ క‌థ‌ని అందించారు. ఈ సినిమాలో బాల‌య్య స్టైలిష్‌ గా క‌నిపించ‌బోతున్న‌ట్టు తెలుస్తోంది. కోన మార్క్ వినోదంతో పాటు, బాల‌య్య మార్క్ యాక్ష‌న్ అంశాలూ ఇందులో పుష్క‌లంగా ఉంటాయ‌ని తెలుస్తోంది. బాల‌య్య స‌ర‌స‌న అంజ‌లి, సోనాల్ చౌహాన్ న‌టిస్తున్నారు. కార్పొరేట్ నిర్మాణ సంస్థ ఏరోస్ ఇంట‌ర్నేష‌నల్ తెలుగులో నిర్మిస్తున్న తొలి సినిమా ఇదే కావ‌డం విశేషం.