ఆ చిన్న సినిమా ‘ప్యాడ్ మ్యాన్’ను కొట్టేసింది

కంటెంట్ బలంగా ఉండాలే కానీ స్టార్లు లేకపోయినా వసూళ్ల వర్షం కురుస్తుందని మరోసారి రుజువైంది. గత నెల చివర్లో హిందీలో ‘సోను కె టిటు కీ స్వీటీ’ అనే చిన్న సినిమా పెద్దగా అంచనాల్లేకుండా విడుదలైంది. కార్తీక్ ఆర్యన్.. నుష్రత్ భరూచా.. సన్నీ నిజార్ అనే కొత్త నటీనటులు కీలక పాత్రల్లో నటించిన ఈ చిత్రాన్ని లవ్ రంజన్ అనే పెద్దగా పేరు లేని దర్శకుడు రూపొందించాడు. ముందు వారం విడుదలైన అక్షయ్ కుమార్ సినిమా ‘ప్యాడ్ మ్యాన్’ బాగా ఆడుతున్న సమయంలోనే రిలీజై ఓ మోస్తరు ఓపెనింగ్స్ తెచ్చుకున్న ఈ చిత్రం మౌత్ టాక్ తో జనాల్లోకి వెళ్లింది. వసూళ్లు రోజు రోజుకూ పెరిగాయి. తొలి రోజు వసూళ్ల కంటే పదో రోజు దీనికి ఎక్కువ కలెక్షన్లు రావడం విశేషం.

ఇప్పుడీ సినిమా మరో ఘనత సాధించించి. ‘ప్యాడ్ మ్యాన్’ను కూడా దాటేసి ఈ ఏడాది అత్యధిక వసూళ్లు సాధించిన బాలీవుడ్ సినిమాల్లో రెండో స్థానానికి చేరింది. మూడో శనివారం కూడా రూ.4.12 కోట్ల వసూళ్లు రాబట్టిన ‘సోను కె టిటు కీ స్వీటీ’ మొత్తంంగా రూ.82 కోట్లకు పైగా గ్రాస్ కలెక్ట్ చేసింది. ‘ప్యాడ్ మ్యాన్’ రూ.80 కోట్ల లోపే వసూళ్లు రాబట్టింది. రొమాంటిక్ కామెడీగా రూపొందిన ‘సోను కె టిటు కీ స్వీటీ’ మరీ కొత్తగా ఏమీ ఉండదు. ఐతే ఆద్యంతం ఆద్యంతం వినోదాత్మకంగా సాగుతుంది. యువ ప్రేక్షకులు ఈ సినిమాతో బాగా కనెక్టయ్యారు. ఐతే పరీక్షల సీజన్లో ఈ చిత్రం ఈ స్థాయిలో వసూళ్లు రాబట్టడం విశేషమే. ఇంకో వారం రెండు వారాలు ఈ చిత్రం చెప్పుకోదగ్గ వసూళ్లు సాధించే అవకాశాలున్నాయి.