'నా 'బయోపిక్'లో నేనే నటిస్తా' అంటున్న స్టార్ యాక్టర్

స్టార్ యాక్టర్ సోనూసూద్ గురించి తెలుగు రాష్ట్రాలతో పాటు దేశవ్యాప్తంగా పరిచయం అక్కరలేదు. ఎక్కువగా విలన్ రోల్స్ లో కనిపించి ప్రేక్షకులను ఆకట్టుకున్నాడు. ఇక అరుంధతి సినిమాలో ప‌శుప‌తిగా చేసిన నటనకు కోట్లలో అభిమానులు ఏర్పడ్డారు. అయితే రీల్ లైఫ్ లో విలన్ రోల్ పోషించే సోనూసూద్ రియల్ లైఫ్ లో మాత్రం హీరో అనిపించుకున్నాడు. కరోనా పై యుద్ధం చేస్తూ.. నిత్యం మనకోసం పోరాడుతున్న వైద్య సిబ్బందికి తానే సాయం చేసేందుకు సోనూసూద్ ముందుకు వచ్చాడు. ముంబైలోని జుహు ప్రాంతంలో ఉన్న తన హోటల్ ఇచ్చేసిన విషయం తెలిసిందే.

కరోనా వైరస్ భాదితులకి చికిత్స అందించడానికి వైద్య సిబ్బంది వాళ్లు ఎక్కడినుంచో వచ్చి ఉంటారు. వారిని జాగ్రత్తగా చూసుకోవడం మన బాధ్యత అన్నాడు సోనూసూద్. వైద్య సిబ్బంది విశ్రాంతి తీసుకునేందుకు, అలాగే హెల్త్ వర్కర్స్ వచ్చి ఉచితంగా భోజనాలు.. అలాగే ఉచితంగా వలస కార్మికులకు ప్రయాణ సౌకర్యం కల్పించాడు. ఇదీ సోనూసూద్ మంచి మనసుతో చేసిన పని. ఇటీవలే వలస కార్మికులతో అల్లుకున్న తన అనుభవాలను ఓ పుస్తక రూపంలో రూపొందిస్తానని ప్రకటించాడు. అయితే సినీ ఇండస్ట్రీలో ప్రస్తుతం బయోపిక్ ల హవా నడుస్తున్న విషయం విదితమే.

ఓ పొలిటిషన్, ఓ స్టార్ నటుడు, ఓ స్వాతంత్ర సమరయోధుడు, క్రీడాకారుడు ఇలా అందరి బయోపిక్స్ రూపొందుతున్నాయి. అయితే బాలీవుడ్ లోని కొందరు ప్రముఖులు సోనూసూద్ బయోపిక్ రూపొందించాలనే ఆలోచనలో ఉన్నట్లు సమాచారం. అయితే దీనిపై సోనూసూద్ స్పందించి.. "నా జీవితం పై తీయబోయే బయోపిక్ మూవీలో నేనే నటిస్తాను. ఎందుకంటే నా లైఫ్ గురించి నాకంటే ఎక్కువగా ఎవరికీ తెలియదు కదా!" అంటున్నాడు. ఈ క్రమంలో సోనూసూద్ బయోపిక్ పై ఆసక్తి నెలకొంది. మరి సోనూసూద్ రాయబోయే పుస్తకం ముందు పబ్లిష్ అవుతుందా.. లేక ఆయన బయోపిక్ ముందు విడుదల కానుందా.. అనేది తెలియాల్సి ఉంది.