వీడియో లీక్‌ : అయ్యో మంచి సీన్స్ మిస్ అయ్యాయే

కంగనా రనౌత్‌ ప్రధాన పాత్రలో తెరకెక్కిన 'మణికర్ణిక' చిత్రం తాజాగా ప్రేక్షకుల ముందుకు వచ్చింది. భారీ అంచనాల నడుమ రూపొందిన ఈ చిత్రంకు ప్రేక్షకుల నుండి మిశ్రమ స్పందన వస్తోంది. ఈ చిత్రంలో మణికర్ణిక పాత్ర పోషించిన కంగనా రనౌత్‌ పై ప్రశంసల జల్లు కురుస్తోంది. ఇదే సమయంలో దర్శకుడు క్రిష్‌ ను ఈ చిత్రం నుండి తప్పించి మొత్తం క్రెడిట్‌ తానే సొంతం చేసుకుందనే విమర్శలను కూడా కంగనా ఎదుర్కొంటోంది. ఈ చిత్రంలోని సదాశివరావు పాత్రను మొదట సోనూ సూద్‌ తో చేయించారు. అయితే కంగనాకు క్రిష్‌ కు ఆ పాత్ర వల్ల గొడవ వచ్చింది.

నిర్మాతలను ఒప్పించి ఆ పాత్ర నిడివి తగ్గించాలని భావించింది. క్రిష్‌ పై ఒత్తిడి తీసుకు వచ్చింది. చరిత్రను వక్రీకరించడం ఇష్టం లేని క్రిష్‌ సినిమా నుండే తప్పుకున్నాడు. తన పాత్ర నిడివి తగ్గించాలని భావించిన కంగనా తీరుపై అసహనంతో సోనూ సూద్‌ కూడా తప్పుకున్నాడు. దాంతో అంతకు ముందు సోనూ సూద్‌ తో తెరకెక్కించిన సీన్స్‌ అన్నింటిని కూడా మరో నటుడు మహ్మద్‌ జీషన్‌ తో రీ షూట్‌ చేసింది. కంగనా పూర్తిగా సదాశివరావు పాత్రను మార్చేసింది. తాజాగా విడుదలైన మణికర్ణిక చిత్రంలో సదాశివరావుకు పెద్దగా ప్రాముఖ్యత లేదు.

సినిమా విడుదలైన ఈ సమయంలో సోనూ సూద్‌ పై మణికర్ణిక కోసం చిత్రీకరించిన షాట్స్‌ ను లీక్‌ చేశారు. సోనూ సూద్‌ సిక్స్‌ ప్యాక్‌ బాడీతో పాటు - అద్బుతమైన సన్నివేశాలను చేసినట్లుగా ఈ లీక్ డ్‌ వీడియో చూస్తుంటే అనిపిస్తుంది. తన పాత్రను డామినేట్‌ చేసే విధంగా సోనూ సూద్‌ ఉన్నాడని, జాన్సీ పాత్ర కంటే సదాశివరావు పాత్ర హైలైట్‌ గా ఉంటుందనే భయంతో కంగనా ఆ పాత్రను తగ్గించి ఉంటుందని, ఆయన స్థానంలో మరొకరితో పెద్దగా ప్రాముఖ్యత లేకుండా చిత్రీకరించి ఉంటుందనిపిస్తుంది. లీక్‌ అయిన సోనూ సూద్‌ వీడియో చూస్తుంటే సినిమాలో సోనూ సూద్‌ ఉంటే సినిమా స్థాయి మరో లెవల్‌ లో ఉండేదనిపిస్తోంది. సోనూ సూద్‌ వీడియోను లీక్‌ చేసింది ఎవరనే విషయంపై ఇంకా క్లారిటీ రావాల్సి ఉంది.

వీడియో కోసం క్లిక్ చేయండి