మరోసారి దేవుడు.. అనిపించుకున్న విలన్!

సోనూసూద్. సౌత్ ఇండియాలో ఈ పేరుకి పెద్దగా పరిచయం అక్కరలేదు. ఎక్కువగా విలన్ రోల్స్ లో కనిపించి ప్రేక్షకులను ఆకట్టుకుంటాడు.. ఇక అరుంధతి సినిమాలో చేసిన ప‌శుప‌తిగా చేసిన నటనకు కోట్లలో అభిమానులు ఏర్పడ్డారు. అయితే రీల్ లైఫ్ లో విలన్ రోల్ పోషించే సోనూసూద్ రియల్ లైఫ్ లో మాత్రం హీరో అనిపించుకుంటున్నాడు. ప్రస్తుతం కరోనాని అరికట్టడానికి కేంద్రం 21 రోజుల లాక్ డౌన్ విధించిన సంగతి తెలిసిందే. ప్రజలు ఇంట్లోనే ఉండాలని ప్రభుత్వాలకి సహకారం అందించాలని కోరాయి. ఇక డాక్టర్లు - నర్సులు - పోలీసులు - మీడియా, -పారిశుద్ధ కార్మికులు తమ ప్రాణాలను పణంగా పెట్టి పని చేస్తున్నారు. కరోనా పై వైద్య సిబ్బంది చేస్తున్న సహకారానికి దేశం మొత్తం ఇప్పుడు సలాం కొడుతోంది. అయితే నిత్యం మనకోసం పోరాడుతున్న వైద్య సిబ్బందికి సాయం చేసేందుకు సోనూసూద్ ముందుకు వచ్చాడు.

అంతేగాక లాక్ డౌన్ కారణంగా ఉపాథి లేక ఆకలితో అలమటిస్తున్న పేదలకు ఆహారం అందిస్తున్నాడు. అది కూడా వంద మందికో, 200 మందికో కాదు.. ప్రతి రోజూ 45వేల మందికి ఆహారం అందిస్తున్నాడు సోను. ముంబయి మున్సిపల్ కార్పొరేషన్ తో కలిసి అంధేరి - జుహు - బాంద్రా ప్రాంతాల్లో ఉన్న పేదలందరికీ ఉచితంగా ప్రతి రోజూ ఆహారం అందిస్తున్నాడు. ఒకవేళ లాక్ డౌన్ ను పొడిగించినా తను తగ్గనని, లాక్ డౌన్ కొనసాగినన్ని రోజులు పేదలకు ఉచితంగా ఆహారాన్ని అందిస్తానని చెబుతున్నాడు. ఇదీ సోనూసూద్ మంచి మనసుతో చేసిన పని. నిజంగా విలన్ చేసిన పనికి ఆ రాష్ట్ర ప్రభుత్వం సైతం మెచ్చుకుంటోంది. తన హోటల్‌ ద్వారా ఉచితంగా భోజనం అందించడం చాలా సంతోషంగా ఉందని సోనూసూద్ తెలిపాడు. సోనూసూద్ చేసిన ఈ సహాయానికి సోషల్ మీడియాలో నెటిజన్స్ అభినందిస్తున్నారు. రీల్ స్క్రీన్ లో విలన్ అయినప్పటికీ రియల్ లైఫ్ లో నిజమైన హీరో నువ్వు అంటూ కామెంట్స్ పెడుతున్నారు.