మహేష్ కూడా ఫోర్బ్స్ కు ఎక్కాడొచ్

బాహుబలి సినిమా మన దేశంలోనే కాదు.. విదేశాల్లోనూ చర్చనీయాంశమైంది. సినిమా విడుదలకు ముందే అంతర్జాతీయ మీడియా హైదరాబాద్ లో వాలిపోయి ఈ సినిమా మీద ప్రత్యేక కథనాలు చేసింది. విడుదల తర్వాత ప్రఖ్యాత టెలిగ్రాఫ్ పత్రిక సినిమా మీద రివ్యూ రాసింది. ఫోర్బ్స్ పత్రిక వరుసగా కథనాలు ప్రచురించింది. విజయేంద్ర ప్రసాద్, రాజమౌళి, ప్రభాస్ ల గురించి ప్రత్యేక కథనాలు చేసింది. ప్రభాస్ మరో హారిసన్ ఫోర్డ్ అవుతాడా అంటూ ఆ పత్రికలో వచ్చిన కథనం బాలీవుడ్ జనాల్ని కూడా విస్మయపరిచేలా చేసింది. ఐతే ‘బాహుబలి’ ప్రత్యేక చిత్రం కాబట్టి ప్రభాస్ కు అంత పాపులారిటీ వచ్చింది. కానీ ‘శ్రీమంతుడు’ లాంటి రెగ్యులర్ సినిమాతోనూ మహేష్ ఫోర్బ్స్ దృష్టిని ఆకర్షించాడు.

ఫోర్బ్స్ పత్రిక ఏటా ఇండియాలో అత్యధిక ఆదాయం ఆర్జించే సినీ నటుల జాబితా ఒకటి ప్రకటిస్తుంటుంది. అందులో మన మహేష్ పేరు కూడా కనిపిస్తుంటుంది. ఐతే ఇప్పుడు ఏకంగా ఫోర్బ్స్ పత్రిక మహేష్ గురించి ప్రత్యేక కథనమే వేసింది. సౌతిండియన్ స్టార్ మహేష్ శ్రీమంతుడుతో ఓ పెద్ద సాహసం చేశాడన్న శీర్షిక తో ఫోర్బ్స్ మహేష్‌ పై కథనాన్ని ప్రచురించింది. 1 నేనొక్కడినే, ఆగడు లాంటి రెండు వరుస పరాజయాల తర్వాత వచ్చిన ‘శ్రీమంతుడు’ సినిమాకు మహేష్ స్వయంగా ఓ నిర్మాత కూడా కావడం ఓ సాహసమే అని పేర్కొంటూ.. ఆ సాహసాన్ని మహేష్ విజయవంతంగా పూర్తి చేశాడని చెప్పింది. ఈ సినిమా ఫస్ట్ వీకెండ్ లో మంచి కలెక్షన్లను సాధించడమే కాక, హిట్ టాక్‌ను కూడా సొంతం చేసుకోవడంతో పుట్టినరోజున మహేష్‌ కు మంచి గిఫ్ట్ దక్కిందని ఫోర్బ్స్ పేర్కొంది. మహేష్ ఈ సినిమాకు రెమ్యూనరేషన్ తీసుకోకుండా నిర్మాణంలోనూ భాగస్వామి కావడంతో శ్రీమంతుడు బడ్జెట్ తగ్గి, విడుదలైన వారానికే సినిమాతో సంబంధమున్న వారు లాభాల పడుతున్నారని ఫోర్బ్స్ కథనంలో పేర్కొనడం విశేషం.