చైతూ మహేష్‌ ఫ్యాన్‌ అయితే విష్ణు ఎన్టీఆర్ ఫ్యాన్‌

అక్కినేని హీరో నాగచైతన్య ప్రస్తుతం విక్రమ్‌ కుమార్‌ దర్శకత్వంలో 'థ్యాంక్యూ' సినిమాను చేస్తున్న విషయం తెల్సిందే. ఆ సినిమాలో చైతూ సూపర్‌ స్టార్‌ మహేష్‌ బాబుకు అభిమానిగా కనిపించబోతున్నాడు. ఇటీవల ఒక్కడు సినిమా విడుదల సందర్బంగా అభిమానిగా చైతూ చేసే హడావుడిని చిత్రీకరించారు. ఆ ఫొటోలు మరియు వీడియోలు సోషల్‌ మీడియాలో ట్రెండ్‌ అయ్యాయి. ఇప్పుడు మరో యంగ్‌ హీరో శ్రీ విష్ణు తన సినిమా లో ఒక స్టార్‌ హీరో అభిమానిగా కనిపించబోతున్నాడు. ఆ స్టార్ హీరో యంగ్‌ టైగర్ ఎన్టీఆర్‌. శ్రీ విష్ణు తన అర్జున పాల్గున సినిమాలో ఎన్టీఆర్ అభిమానిగా కనిపించబోతున్నాడట.

శ్రీ విష్ణు నేడు 'గాలి సంపత్‌' సినిమా తో ప్రేక్షకుల ముందుకు రాబోతున్న విషయం తెల్సిందే. ఇదే సమయంలో ఆయన అర్జున పాల్గున సినిమా లో నటిస్తున్నాడు. తాజాగా నటిస్తున్న ఈ సినిమా లో ఎన్టీఆర్ కు వీరాభిమానిగా శ్రీవిష్ణు నటిస్తున్నట్లుగా యూనిట్‌ సభ్యుల ద్వారా తెలుస్తోంది. అరవింద సమేత సినిమా లో ఎన్టీఆర్ కత్తి పట్టుకుని అలా నడుచుకుంటూ వచ్చే ఫొటో ప్లెక్సీ కొట్టించి దానిపై పుట్టిన రోజు శుభాకాంక్షలు అంటూ వేయించారు.

విశ్వసనీయంగా అందుతున్న సమాచారం ప్రకారం అర్జున పాల్గున సినిమాలో ఎన్టీఆర్‌ బర్త్‌ డే సన్నివేశం ఒకటి ప్రధాన ఆకర్షణగా నిలుస్తుందని అంటున్నారు. హీరో అయిన శ్రీవిష్ణు తన అభిమాన హీరో ఎన్టీఆర్ బర్త్‌ డే సందర్బంగా వేడుకల్లో పాల్గొంటున్న సమయంలో కథలో ట్విస్ట్‌ ఉంటుందట. మొత్తానికి యంగ్‌ హీరోలు ఇలా స్టార్‌ హీరోల అభిమానులుగా తమ సినిమాల కోసం మారడం తో ప్రేక్షకుల్లో ఆసక్తిని రేకెత్తిస్తున్నారు.