ఫ్యాన్ బాయ్ మొమెంట్ అంటున్న టాలీవుడ్ హీరో

కళారంగంలో ఉండే వారికి ముఖ్యంగా నటీనటులకు దర్శకులకు ప్రశంసలు అందుకోవడం కంటే మించిన సంతోషం ఏముంటుంది చెప్పండి? అందులోనూ తమ ఫేవరేట్ హీరోల నుంచి కనుక ప్రశంసలు అందుకుంటే ఆ ఆనందం డబల్ అవుతుంది. టాలెంటెడ్ హీరోగా పేరుతెచ్చుకున్న శ్రీవిష్ణుకు ప్రస్తుతం అలాంటి సందర్భమే వచ్చింది.

శ్రీవిష్ణు.. సత్యదేవ్.. రాహుల్ రామకృష్ణ.. ప్రియదర్శి.. నివేద థామస్.. నివేద పేతురాజ్ కీలకపాత్రల్లో నటించిన చిత్రం 'బ్రోచేవారెవరురా'. వివేక్ ఆత్రేయ దర్శకత్వంలో తెరకెక్కిన ఈ సినిమాకు పాజిటివ్ రివ్యూస్.. మంచి టాక్ రావడంతో సక్సెస్ దిశగా దూసుకుపోతోంది. రీసెంట్ గా 'బ్రోచేవారెవరురా' టీమ్ ను విక్టరీ వెంకటేష్ ప్రత్యేకంగా అభినందించారు. ఈ విషయాన్ని తెలుపుతూ శ్రీవిష్ణు "ఫ్యాన్ బాయ్ మొమెంట్. ఆయన దగ్గర నుండి ప్రశంసలు అందుకోవడం అద్బుతం" అంటూ ట్వీట్ చేశాడు. ట్వీట్ తో పాటుగా శ్రీవిష్ణు ఒక ఫోటో పోస్ట్ చేశాడు. ఫోటోలో వెంకటేష్.. దర్శకుడు వివేక్ ఆత్రేయ కూడా ఉన్నారు.

ఈ సినిమాకు పలువురు సెలబ్రిటీల నుంచి ప్రశంసలు లభిస్తున్నాయి. ఇప్పటికే న్యాచురల్ స్టార్ నాని.. సీనియర్ దర్శకుడు కె. రాఘవేంద్ర రావు ఈ సినిమాపై ప్రశంసల వర్షం కురిపించారు. ఈమధ్య కాలంలో టాలీవుడ్ లో వచ్చిన కామెడీ సినిమాల్లో ఇది బెస్ట్ అనే అభిప్రాయం వ్యక్తం అవుతోంది.