'భళా తందనాన' ఫస్ట్ లుక్: ఇంటెన్స్ మాస్ అవతార్ లో శ్రీవిష్ణు..!

వర్సటైల్ హీరో శ్రీవిష్ణు విభిన్నమైన సినిమాల్లో విలక్షణమైన పాత్రలలో తనకంటూ ప్రత్యేకమైన గుర్తింపు తెచ్చుకున్నారు. కంటెంట్ ని నమ్మి స్క్రిప్ట్ కి ప్రాధాన్యతనిస్తూ వరుస విజయాలు అందుకుంటున్నారు. ఇటీవలే 'రాజ రాజ చోర' చిత్రంతో బ్లాక్ బస్టర్ అందుకున్న శ్రీవిష్ణు.. ఇప్పుడు 'అర్జున ఫల్గుణ' మూవీని రిలీజ్ కు రెడీ చేశారు. ఇదే క్రమంలో తాజాగా ''భళా తందనాన'' సినిమా షూటింగ్ ముగించారు.

''భళా తందనాన'' చిత్రానికి 'బాణం' ఫేమ్ చైతన్య దంతులూరి దర్శకత్వం వహిస్తున్నారు. సాయి కొర్రపాటి సమర్పణలో వారాహి చలన చిత్రం బ్యానర్ పై రజిని కొర్రపాటి నిర్మిస్తున్నారు. ఇది వైవిధ్యమైన కాన్సెప్ట్ తో తెరకెక్కుతున్న కమర్షియల్ ఎంటర్టైనర్ అని మేకర్స్ పేర్కొన్నారు. ఇప్పటికే విడుదలైన టైటిల్ పోస్టర్ మంచి రెస్పాన్స్ తెచ్చుకుంది. తాజాగా ఈ సినిమా షూటింగ్ కంప్లీట్ అయిన విషయాన్ని వెల్లడిస్తూ.. ఫస్ట్ లుక్ పోస్టర్ ని రిలీజ్ చేశారు.

ఇందులో శ్రీవిష్ణు ఇంటెన్స్ లుక్ లో కనిపిస్తున్నారు. డెనిమ్ షర్ట్ మరియు జీన్స్ ధరించి.. రెండు చేతుల్లో రెండు తుపాకీలతో నిలబడి ఉన్నాడు. బ్యాగ్రౌండ్ లో రౌడీలను చూస్తుంటే.. శ్రీవిష్ణు వారితో పోరాటానికి సిద్ధంగా ఉన్నట్లు తెలుస్తోంది. ఫస్ట్ లుక్ పోస్టర్ తోనే 'భళా తందనాన' చిత్రంలో యాక్షన్‌ పాళ్ళు ఎక్కువే అనే అభిప్రాయం కలుగుతోంది. అంతేకాదు టాలెంటెడ్ హీరో ఇంతకు ముందెన్నడూ పోషించని మాస్ పాత్రలో కనిపించనున్నారని హింట్ ఇస్తోంది.

''భళా తందనాన'' చిత్రంలో శ్రీ విష్ణు సరసన క్యాథరిన్ ట్రెసా హీరోయిన్ గా నటిస్తోంది. 'కేజీఎఫ్' ఫేమ్ రామచంద్రరాజు(గరుడ) మెయిన్ విలన్ గా కనిపించనున్నారు. శ్రీకాంత్ విస్సా సంభాషణలు రాస్తున్న ఈ చిత్రానికి మెలోడీ బ్రహ్మ మణిశర్మ సంగీతం సమకూరుస్తున్నారు. సురేష్ రగుతు సినిమాటోగ్రఫీ అందిస్తుండగా.. మార్తాండ్ కె వెంకటేష్ ఎడిటింగ్ వర్క్ చేస్తున్నారు. గాంధీ నడికుడికర్ ఆర్ట్ డైరెక్టర్ గా వ్యవహరిస్తున్నారు. ప్రస్తుతం ఈ సినిమా పోస్ట్ ప్రొడక్షన్ కార్యక్రమాలు శరవేగంగా జరుగుతున్నాయి.