శ్రీవిష్ణు మళ్ళీ మీసం తిప్పుతాడా..?

క్యారెక్టర్ ఆర్టిస్ట్ గా కెరీర్ ను మొదలు పెట్టి, విభిన్నమైన సినిమాల్లో వైవిధ్యమైన పాత్రలలో నటిస్తూ తనకంటూ మంచి గుర్తింపు తెచ్చుకున్న నటుడు శ్రీవిష్ణు..అప్పట్లో ఒకడుండేవాడు, మెంటల్ మదిలో, నీది నాదీ ఒకే కథ వంటి సినిమాలతో శ్రీవిష్ణు ప్రేక్షకుల్లో తనదైన ముద్ర వేసుకున్నాడు. మెల్లగా ఫామ్ లోకి వస్తున్న ఈ హీరోకి 'బ్రోచేవారెవరురా' సినిమా ద్వారా తన కెరీర్లోనే మంచి హిట్ సొంతం చేసుకున్నాడు. ఆ తర్వాత వచ్చిన 'వీరభోగ వసంతరాయ' చిత్రంతో పరాజయాన్ని మూటగట్టుకున్నాడు. మాస్ ఇమేజ్ కోసం పాకులాడుతూ తీసిన ‘తిప్పరా మీసం’ డిసాస్టర్ గా మిగిలిపోయింది. ఈ సినిమాలో శ్రీవిష్ణు నెగటివ్‌ షేడ్స్ తో డిఫరెంట్ లుక్ తో కనిపించడంతో మంచి హైప్‌ క్రియేట్‌ అయింది. కానీ ఈ సినిమా ప్రేక్షకులను అనుకున్నంతగా ఆకట్టుకోలేకపోయింది.

ప్రస్తుతం శ్రీవిష్ణు 'రాజ రాజ చోర' అనే చిత్రంలో నటిస్తున్నాడు. ఈ చిత్రానికి హసిత్ గోలి దర్శకత్వం వహిస్తుండగా ప్రముఖ చలన చిత్ర నిర్మాణ సంస్థలు పీపుల్ మీడియా ఫ్యాక్టరీ, అభిషేక్ అగర్వాల్ ఆర్ట్స్ సంయుక్తంగా ఈ చిత్రాన్ని నిర్మిస్తున్నాయి. వాస్తవానికి శ్రీవిష్ణుకి కామెడీ రోల్స్, హ్యూమర్ టచ్ ఉన్న రోల్స్ అయితేనే సెట్ అవుతాయని సినీ అభిమానుల అభిప్రాయం. కానీ కమెర్షియల్ హీరో అనిపించుకోవాలనే ఆశతో 'తిప్పరామీసం' సినిమా తీసి బొక్కబోర్లా పడ్డాడు. అయితే ఇప్పుడు ఇలాంటివి పక్కన పెట్టి మంచి ఫ్యామిలీ అండ్ కామెడీ ఎంటర్టైనర్ చిత్రాలను తీయాలని నిర్ణయించుకున్నాడట. అందులో భాగంగానే 'రాజ రాజ చోర' సినిమా చేస్తున్నాడట. అంతేకాకుండా మరో కామెడీ అండ్ ఫ్యామిలీ ఎంటర్టైనర్ పట్టాలెక్కించబోతున్నట్లు సమాచారం. ఈ చిత్రాల ద్వారా ఎలాగైనా హిట్ కొట్టాలనే కసితో ఉన్నాడని సమాచారం. మాస్ ఇమేజ్ కోసం ట్రై చేసి మీసం తిప్పడం కంటే మనకు సెట్ అయ్యే చిత్రాలతో కూడా మీసం తిప్పొచ్చని దగ్గరి సన్నిహితులు సలహా ఇచ్చారట. మరి ఈ చిత్రాల ద్వారా శ్రీవిష్ణు తన విజయాల పరంపరను కొనసాగిస్తాడేమో చూడాలి.