‘పులి’ దెబ్బ నుంచి శ్రీదేవి కోలుకుని...

‘ఇంగ్లిష్ వింగ్లిష్’ లాంటి క్లాస్ మూవీతో రీఎంట్రీ ఇచ్చి తన అభిమానుల్ని మెస్మరైజ్ చేసింది శ్రీదేవి. ఐతే ఆ తర్వాత బోలెడన్ని ఆఫర్లు వచ్చినా అతిలోక సుందరి ఒప్పుకోలేదు. ఆమె రిజెక్ట్ చేసిన సినిమాల్లో ‘బాహుబలి’ కూడా ఉండటం విశేషం. రాజమౌళి మీద లేని నమ్మకం తమిళ దర్శకుడు చింబుదేవన్ మీద పెట్టి.. ‘పులి’ సినిమాకు ఓకే చేసింది శ్రీదేవి. కానీ ఆమె నిర్ణయం ఎంత తప్పో తర్వాతే తెలిసొచ్చింది. ‘బాహుబలి’ ఎంత పెద్ద బ్లాక్ బస్టర్ అయిందో.. ‘పులి’ అంత పెద్ద డిజాస్టర్ అయింది. బాహుబలి వదులుకున్న బాధ ఓవైపు.. పులి ఇలా అయిపోయిందే అన్న బాధ మరో వైపు.

మొత్తానికి శ్రీదేవి కోలుకోవడానికి చాలా సమయమే పట్టింది. ఈ మధ్యలో వచ్చిన ఆఫర్లన్నింటినీ ఆమె తిరస్కరించింది.
ఐతే ఎట్టకేలకు ‘పులి’ దెబ్బ నుంచి కోలుకుని తాజాగా ఓ హిందీ సినిమాకు సంతకం చేసింది శ్రీదేవి. ఇందులో ఆమె ‘ఇంగ్లిష్ వింగ్లిష్’ తరహాలోనే మిడిలేజ్డ్ మదర్ పాత్ర పోషించబోతోందట. బాలీవుడ్లో అద్భుతమైన నటుడిగా పేరు తెచ్చుకున్న నవాజుద్దీన్ సిద్దిఖి ఆమెకు జంటగా నటిస్తుండటం విశేషం. రవి ఉడ్యావర్ అనే కొత్త దర్శకుడు ఈ చిత్రాన్ని రూపొందించబోతున్నాడు. ఓ వైవిధ్యమైన కథ చెప్పి రవి శ్రీదేవిని ఒప్పించాడట. ఆమె పాత్ర కూడా చాలా కొత్తగా ఉంటుందట. ప్రస్తుతం ప్రి ప్రొడక్షన్ వర్క్ జరుగుతోంది. శ్రీదేవి భర్త బోనీ కపూరే స్వయంగా ఈ చిత్రాన్ని నిర్మించే అవకాశాలున్నాయి. ఈ సినిమా పూర్తయ్యే వరకు శ్రీదేవి మరో సినిమా అంగీకరించబోదట.