మహేశ్ జపం చేస్తున్న బెంగుళూరు బ్యూటీ!

చిత్రపరిశ్రమలోకి నటీనటులుగా అడుగుపెట్టిన వారిని పలకరిస్తే చాలు, స్టార్ హీరోల పేర్లు చెబుతుంటారు. ఫలానా హీరోను స్ఫూర్తిగా తీసుకుని ఇండస్ట్రీకి వచ్చానని కొత్త హీరోలు చెబితే, ఫలానా హీరోతో తప్పకుండా జోడీ కట్టాలనే ఆశతో వచ్చానని హీరోయిన్లు చెబుతుంటారు. ఫేవరేట్ హీరో ఎవరు అని అడిగితే మాత్రం, ముందుగానే రాసుకున్నట్టుగా ముందు వరుసలో ఉన్న అందరి హీరోల పేర్లను చెప్పేస్తుంటారు. ముందుచూపు విషయంలో హీరోయిన్లు చాలా ముందుంటారు అనే విషయాన్ని చాలామంది నిరూపించారు కూడా.

అయితే కొత్తగా తెలుగు తెరకి పరిచయమైన ఒక కోమలి మాత్రం అందరి హీరోలు ఇష్టమేనంటూ, మహేశ్ బాబుతో ముందుగా నటించేయాలనే ఉత్సాహాన్ని వ్యక్తం చేస్తోంది. అంతగా మహేశ్ కోసం ఆరాటపడిపోతున్న ఆ బెంగుళూరు బ్యూటీ పేరే శ్రీలీల. 'పెళ్లి సందD' సినిమాతో పిప్పరమెంటులాంటి ఈ పిల్ల పరిచయమైంది. వెండి గిన్నెలో వెన్నముద్దలా కనిపించిన ఈ అమ్మాయిని చూసి కుర్రాళ్లంతా ముచ్చటపడ్డారు. వాళ్లందరికీ కూడా వెండితెర గోల్డ్ కలర్ కోటింగ్ తో కనిపించింది. ఈ సుందరి ఇక్కడ మరిన్ని సినిమాలు చేయాలని వాళ్లు కోరుకుంటున్నారు.

ప్రస్తుతానికి శ్రీలీల .. రవితేజ సరసన నాయికగా ఒక సినిమా చేస్తోంది. ఈ సినిమా షూటింగు దశలో ఉంది. ఈ లోగానే అమ్మాయికి ఆఫర్లు బాగానే వస్తున్నాయి. అయితే మహేశ్ బాబుకి మాత్రమే మనం బాగా మ్యాచ్ అవుతాం .. అలాంటి ఆఫర్ కోసం వెయిట్ చేస్తున్నాని చెబుతోందట. పారితోషికం విషయంలో పట్టుబడితే ఎలాగో అలా నచ్చజెప్పవచ్చు. కానీ స్టార్ హీరో విషయంలో పట్టుబడితే, 'సరేనమ్మా నువ్వు బాధపడకు .. మేం తీసుకొస్తాం' అంటూ భరోసా ఇవ్వడం అందరివలన అవుతుందా? కానీ ఈ పాల బుగ్గల పిల్ల పట్టువీడటం లేదట.

హీరోయిన్ గ్లామరస్ ఉండి .. కుర్రాళ్లలో మంచి క్రేజ్ తెచ్చుకుంటే, స్టార్ హీరోల సరసన అవకాశం రావడానికి ఎంతో కాలం పట్టడం లేదు. ఈ లోగా యంగ్ స్టార్ హీరోలతో సినిమాలను చుట్టబెట్టేయాలి. ఈ విషయంలో కృతి శెట్టి ప్లానింగును శ్రీలీల ఫాలో అయితే బాగుంటుందేమో. ఆ అమ్మాయి ఒక్క స్మైల్ తోనే యూత్ ను మొత్తం కట్టిపడేసింది. నాని .. రామ్ .. నితిన్ .. చైతూ .. ఇలా వరుస సినిమాలతో తన జోరు చూపిస్తోంది. అందువలన ఇప్పుడు శ్రీలీల చేయవలసిందేంటంటే మహేశ్ కళ్లలో తాను పడేలా వరుస సినిమాలతో చెలరేగిపోవడమే.