శ్రీదేవి సినిమాలే ఇడ్లీలు-పూరీలు

బాలీవుడ్ ని దక్షిణాది భామలు ఏలడం సులువేమీ కాదు. ఇప్పటి అందాల భామలే అక్కడ అవకాశాల కోసం నానా తంటాలు పడాల్సి వస్తోంది. కానీ కొన్ని దశాబ్దాలకు పూర్వమే.. బాలీవుడ్ మహరాణిగా వెలిగిపోయిన అనిర్వచనీయమైన అందం.. ప్రతిభ శ్రీదేవి సొంతం. తమిళనాడు.. ఆంధ్ర.. ముంబై.. ఇలా ఏరియాలతో సంబంధం లేకుండా కోట్ల కొద్దీ అభిమానులు ఆమెను ఆరాధించారు.

ఇప్పటికీ ఆమెను విపరీతంగా అభిమానించే ఫ్యాన్స్ కు కొదువేమీ ఉండదు. అందుకే ఇంగ్లిష్ వింగ్లిష్ అంటూ శ్రీదేవి రీఎంట్రీ ఇచ్చినా సినిమాను హిట్టు చేసేశారు. మామ్ మూవీ ఆకట్టుకోలేకపోయింది కానీ.. ఇప్పుడామె కూతురు కోసం తెగ వెయిట్ చేస్తున్నారు ఫ్యాన్స్. శ్రీదేవిని విపరీతంగా ఆరాధించే ఓ అభిమాని ఒకరు.. తన అభిమానాన్ని వెరైటీగా చాటుకున్నాడు. ఈయన ఓ రెస్టారెంట్ ప్రారంభిస్తుండగా.. అక్కడ అంతా శ్రీదేవి మయం చేసేయడంలో ఆశ్చర్యం లేదు. ఇవాల్టి రోజుల్లో అన్నీ థీమ్ బేస్డ్ రెస్టారెంట్స్ కాబట్టి.. ఈయన ఓపెన్ చేస్తున్నది శ్రీదేవి అభిమానం థీమ్ అనుకోవచ్చు.

అయితే.. తన రెస్టారెంట్ లో ఉండే ఫుడ్ ఆర్టికల్స్ అన్నిటికీ.. శ్రీదేవి నటించిన సినిమాల పేర్లు పెట్టాడు ఈ ఫ్యాన్. అంటే ఇడ్లీలు-పూరీల నుంచి బిర్యానీ వరకూ అన్నీ ఏదో శ్రీదేవి సినిమా పేరే ఉంటుందన్న మాట. ఇప్పటికే రెస్టారెంట్ ఓపెనింగ్ కి శ్రీదేవిని పిలిచాడు కానీ.. ఆ ఆహ్వానానికి ఆమె నుంచి ఇంకా స్పందన లభించలేదు.