ఆగస్టు నెలాఖరున థియేటర్లలో సౌండ్ చేయనున్న 'శ్రీదేవి సోడా సెంట‌ర్‌'

కరోనా సెకండ్ వేవ్ పరిస్థితుల తర్వాత థియేటర్స్ తెరుచుకోవడంతో సినిమాలన్నీ రిలీజ్ కు రెడీ అవుతున్నాయి. కంటెంట్ బాగున్న చిత్రాలకు ప్రేక్షకాదరణ లభిస్తుండటంతో, ఇప్పుడు మరికొన్ని క్రేజీ మూవీస్ థియేటర్లలోకి రావడానికి రెడీ అయ్యాయి. తాజాగా సుధీర్ బాబు హీరోగా నటించిన ''శ్రీదేవి సోడా సెంట‌ర్‌'' సినిమా విడుదల తేదీని కూడా ఫిక్స్ చేశారు.

'పలాస 1978' ఫేమ్ కరుణ కుమార్ దర్శకత్వంలో తెరకెక్కుతున్న 'శ్రీదేవి సోడా సెంట‌ర్‌' చిత్రాన్ని ఆగస్టు 27న గ్రాండ్ గా థియేట్రికల్ రిలీజ్ చేస్తున్నట్లు అధికారికంగా ప్రకటించారు. ఇప్పటికే విడుదల చేసిన ఫస్ట్ లుక్ - టీజర్ - సాంగ్స్ తో ఈ సినిమాపై బజ్ ఏర్పడింది. మరి ఈ సోడా సౌండ్ థియేటర్లలో ఏ రేంజ్ లో మోగుద్దో చూడాలి.

'శ్రీదేవి సోడా సెంట‌ర్‌' చిత్రాన్ని 70 ఎంఎం ఎంట‌ర్‌టైన్మెంట్స్ బ్యాన‌ర్ పై విజ‌య్ చిల్లా - శ‌శి దేవిరెడ్డి సంయుక్తంగా నిర్మిస్తున్నారు. ఇందులో సుధీర్ సరసన తెలుగమ్మాయి ఆనంది హీరోయిన్ గా నటిస్తోంది. లైటింగ్ సూరిబాబుగా సుధీర్ బాబు.. సోడాల శ్రీదేవిగా ఆనంది కనిపించనున్నారు. పావెల్ నవగీతన్ - నరేష్ - సత్యం రాజేష్ - రఘుబాబు - అజయ్ - హర్షవర్ధన్ - సప్తగిరి - రోహిణి ఇతర పాత్రలు పోషిస్తున్నారు.

సంగీత బ్రహ్మ మణిశర్మ ఈ చిత్రానికి సంగీతం సమకూర్చారు. శ్యామ్ దత్ సైనుద్దీన్ సినిమాటోగ్రఫీ అందించగా.. శ్రీకర్ ప్రసాద్ ఎడిటింగ్ వర్క్ చేస్తున్నారు. ఆగస్టు 27 నాటికి పరిస్థితులు ఇంకా మెరుగుపడే అవకాశం ఉండటం 'శ్రీదేవి సోడా సెంట‌ర్‌' చిత్రానికి కలిసొచ్చే అంశం. ఈ నేపథ్యంలో చిత్ర బృందం రాబోయే రోజుల్లో శరవేగంగా ప్రమోషనల్ కార్యక్రమాలు చేయడానికి ప్లాన్ చేసుకుంటున్నారని తెలుస్తోంది.